«Օրվա ռեժիմ» արտահայտությունը շատերի մոտ խիստ կանոնների և բացասական զգացողությունների հետ է կապվում, իսկ պլաններ կազմելը թվում է անօգուտ գործ: Սակայն դա այդքան էլ ճիշտ չէ: Ինչպես գիտես, մտքերը նյութականանալու հատկություն ունեն: Ու եթե երազանքներդ մշտապես մտքումդ պահես, ապա դրանց իրականանալու հավանականությունը կմեծանա:

Մի քանի պարզ կանոն կօգնեն քեզ վերափոխել կյանքը և ավելի մոտենալ երազանքի իրականացմանը:

1.    Ամեն ինչ ըստ ժամկետացանկի

Փաստերը խոսում են այն մասին, որ օրգանիզմը հարմարվում է որոշակի կենսառիթմի կամ ռեժիմի (տե’ս «Օրվա ռեժիմ» նյութը) և ցանկացած շեղում կարող է սթրես առաջացնել: Հետևաբար, եթե աշխատանքային օրերին ժամանակին ես քնում, իսկ հանգստյան օրերին մինչ կեսգիշեր համացանցում ես ու հազիվ ես արթնանում առավոտյան, ապա զարմանալու կարիք չկա, եթե նույնիսկ հանգստյան օրերին հոգնածություն ես զգում: Չէ՞ որ բնությանը չես կարող խաբել. գիշերը քնելու համար է: Հենց գիշերային ժամերին՝ մոտավորապես 23⁰⁰-ին, օրգանիզմը սկսում է վերականգնել ուժերը և արտադրում է հորմոններ, որոնք անհրաժեշտ են օրգանիզմի նորմալ գործունեության, ֆիզիկական և հոգեկան առողջության համար:

Ուստի, փորձի՛ր չխախտել քնի նորմալ ռեժիմը: Հանգստյան օրերին նույնպես ժամանակին քնիր և վաղ արթնացիր և դա արա հաճույքով. չէ՞ որ ողջ օրը քոնն է: Չկան դասեր և պարապմունքներ (բացառությամբ մի քանի տնային պարտականությունների): Զարթնիր առավոտյան և վայելիր անձնական գործերով հագեցած երկար օրը:

Իհարկե, լավ ինքնազգացողության համար կարևոր է ոչ միայն ժամանակին քնելը, այլ նաև առողջ սնվելը (ցանկալի է միևնույն ժամին) և մաքուր օդին զբոսնելը: Եթե դժվարանում ես ինքնուրույն կազմել օրվա ռեժիմը, օգնության կանչիր ընկերներիդ և միասին ձևավորեք օգտակար սովորություններ: Հոգեբանները պնդում են, որ նոր սովորություն ձեռք բերելու համար մարդուն անհրաժեշտ է 21 օր, որի ընթացքում օրգանիզմը հասցնում է հարմարվել նոր ռեժիմին:

2. Երջանիկ առավոտ

Եթե առավոտյան ժամերին վատ տրամադրություն ես ունենում և վրա են հասնում կուտակված գործերի մասին մտքերը, մտածիր լավ բաների մասին: Տպիր մտերիմների հետ արված լուսանկարներ, հաճելի պահեր ճամփորդություններից կամ պարզապես լուսանկարներ, որտեղ դու իսկապես երջանիկ ես: Փակցրու դրանք մահճակալիդ դիմաց և լուսաբացը դիմավորիր ժպիտով, չէ՞ որ հաճելի պահեր քո կյանքում շատ են եղել: Յուրաքանչյուր նոր օր կարող է գեղեցիկ հիշողություն դառնալ:

3. Ցանկությունների քարտեզ

Որպեսզի ցանկություններն իրականանան, հարկավոր է դրանք հստակ ձևակերպել: Դա նաև հաճելի զբաղմունք կարող է դառնալ: Համացանցը լի է խորհուրդներով, թե ինչպես պատրաստել ցանկությունների քարտեզ: Հարկավոր է վերցնել մի մեծ պաստառ և վրան որոշակի դասավորվածությամբ փակցնել տարբեր նկարներ, որոնք քո երազանքն են արտացոլում: Դրանք կարելի է գտնել ամսագրերում կամ համացանցում: Դա կարող է լինել ցանկացած բան՝ նոր գաջեթ, քո երազանքների քաղաքը, հագուստ և այլն: Փակցրու նկարները և հստակ նշիր դրանց իրականացման ժամկետները: Որպեսզի դատարկ տարածքները լրացնելը հեշտ լինի, բաժանիր պաստառը բաժինների: Օրինակ՝ «ճամփորդություն» բաժնում փակցրու քո երազանքի քաղաքի կամ ինքնաթիռի, իսկ «խնամք/սնունդ» հատվածում՝ կատարյալ սպորտային կեցվածքով վազորդի նկար: Պաստառը փակցրու տեսանելի վայրում և ժամանակ առ ժամանակ համալրիր այն նոր ցանկություններով: Եվ, որ ամենակարևորն է՝ անկեղծորեն հավատա, որ դրանք կիրականանան 🙂

4. Ուզում ես երկարատև ճամփորդության մեկնե՞լ: Արա՛ առաջին քայլը:

Քո արդարացումը կարող է լինել այն հանգամանքը, որ ստեղծագործող ես և ամեն բան պետք է անես վայրկենապես՝ ներշնչանքի պահին: Բայց հաջողակները պնդում են, որ նպատակների իրականացմանը օգնում է կազմակերպվածությունը: Դա նշանակում է, որ ամեն օր անհրաժեշտ է դեպի երազանք տանող մի քայլ կատարել: Եթե քո առջև նպատակ ես դրել` վազել 20կմ և լինել հաղթող, հարկավոր է ամեն օր վազել քիչ-քիչ և ձեռք բերել տոկունություն: Եթե ուզում ես մինչև 2020 թվականը մի քանի հարյուր գիրք կարդալ, ուրեմն ամեն օր կարդա մի քանի էջ: Միայն այդ դեպքում, թեկուզ փոքր քայլերով, կկարողանաս վստահ և հաստատուն մոտենալ երազանքի իրականացմանը:

4.    Գովի՛ր ինքդ քեզ

Եթե դու օրվա կամ շաբաթվա ընթացքում շատ գործեր ունես, ուրեմն դրանց վերաբերյալ նշումներ կատարելու համար ունեցիր հատուկ նոթատետր: Կարելի է դրանք դասավորել որոշակի հերթականությամբ, օրինակ՝ ըստ կարևորության: Օրվա ընթացքում ջնջիր կատարվածները: Ավելորդ չի լինի նաև վերլուծել համացանցային նորություններին հետևելու և սոցիալական կայքերում շփումների վրա ծախսած ժամանակը: Եթե զգում ես, որ համացանցը քեզ իրոք խանգարում է, աստիճանաբար կիրառիր որոշ սահմանափակումներ, օրինակ՝ համացանցում անցկացրած ժամերը չգերազանցել 2-2,5 ժամից: Կտեսնես, թե որքան ազատ ժամանակ կունենաս:

Երեկոյան աչքի անցկացրու նշումները և վերլուծիր օրվա արդյունավետությունը: Չմոռանաս գովել քեզ լավ աշխատանքի համար: Այս մոտեցումը կոգևորի քեզ և կձգտես ավելիին: Նպատակը գործողությունների վրա հիմնված երազանքն է: Ուստի, համարձակ պլանավորի՛ր կյանքը և գործի՛ր:

Նկարների համար շնորհակալություն այս աղբյուրին:

Հոդվածի կազմող` Սվետլանա Վերտոլա:

Կարդացեք նաև

Ինչպես օրվա տևողությունը երկարացնել 4 ժամով կամ վաղ առավոտյան արթնանալու մի քանի պատճառ

«Ոչ մի կերպ չեմ կարողանում հագենալ քնից», «Ժամանակը չի հերիքում անհրաժեշտ գործերն անելու համար», «Ես նորից քնով եմ անցել», «Ես ինձ շատ հոգնած և թույլ եմ զգում». ծանոթ արտահայտություննե՞ր են: Գերծանրաբեռնվածությունը մեր ժամանակների ամենատարածված խնդիրներից է: Եթե ուզում ես իմանալ՝ ինչպես պայքարել դրա դեմ, ապա կարդա այս նյութը:

ավելին →

Ինչպես սկսել օրը լավ տրամադրությամբ. 7 թեժ խորհուրդ

Երևի թե գիտես, որքան դժվար է արթնանալ առավոտյան, հատկապես ձմռանը տաք վերմակի տակից դուրս գալ: Օրվա տարաբնույթ գործերը, քնելու անզուսպ ցանկությունը, բարձր ձայնով զանգող զարթուցիչը. այս ամենի պատճառով դժվար է սկսել օրը լավ տրամադրությամբ: Թե ինչպես ճիշտ արթնանալ, կարդա՛ մեր հոդվածում:

ավելին →

Ինչպես ճիշտ կոփվել

Կոփումն առողջ ապրելակերպի բաղադրիչներից մեկն է: Մարմնի կոփման տարբեր մեթոդները հնարավորություն են տալիս բարելավել ընդհանուր առողջական վիճակը, բարձրացնել իմունիտետը և օրգանիզմի հարմարվելու կարողությունը։ Իսկ թե ինչպե՞ս կոփվել` առանց վնաս հասցնելու օրգանիզմին, կարդա՛ այս հոդվածում:

ավելին →

Ինչպես տղան պետք է իրեն պահի, որ չհայտնվի… բռնության մեղադրանքի առջև

Աղջիկը հետաքրքրված հայացքներ է նետում քեզ վրա, և դու հասկանում ես, որ նա անտարբեր չէ քո նկատմամբ: Բայց հենց փորձում ես նրան մոտենալ և հպվել, ապա աղջիկը վանում է քեզ կամ ապտակում: Ո՞րն է պատճառը: Ի՞նչն այնպես չես արել:

ավելին →