Լավագույնը հարաբերությունների և սիրո մասին: Ռեալ ժամանակի պայմաններում:

Ինչպես սովորել սիրել սեփական մարմինը (մաս 2)

Բավականին մեծ թվով մարդիկ ունեն տարատեսակ բարդույթներ և ամաչում են սեփական արտաքինից: Ինչպե՞ս ազատվել ավելորդ ամաչկոտությունից և ձեռք բերել ինքնավստահություն: Շարունակենք խոսել սեփական մարմինը սիրելու և ընդունելու մասին:

Նախորդ հոդվածում մենք անդրադարձանք այն խնդրին, թե ինչից է առաջանում մեր անվստահությունը և սեփական մարմնի նկատմամբ բացասական վերաբերմունքը: Իսկ ի՞նչ է օգնում ազատվել արտաքին տեսքի հետ կապված ավելորդ ամաչկոտությունից և անհամարձակությունից:

Ինչպե՞ս սովորել ընդունել ինքդ քեզ, քո մարմինը:

Մարդկանց մեծ մասն ունի այս կամ այն «թերությունները», ոմանք` նույնիսկ տարբեր բարդույթներ: Սակայն ոչ բոլորն են ցույց տալիս իրենց անհամարձակությունը և վախը կամ կարողանում են հաղթահարել այն: ☺️Չափազանց կարևոր է սովորել ուշադրություն դարձնել մարդկանց դրական և ուժեղ կողմերին և փակել աչքերը որոշ թերությունների վրա:

Եթե դու ցանկանում ես, որ մտերիմ մարդն իմանա քո վախերի մասին, անվստահ ես, որ նա քեզ ընդունում է քո «թերություններով» հանդերձ, դու կարող ես բարձրաձայնել և քննարկել այդ հարցը նրա հետ: Կարող ես խնդրել ընկերոջդ օգնել քեզ զգալ ավելի ինքնավստահ, օրինակ` հաճոյախոսություններ անելով կամ ուշադրություն դարձնելով քո լավ և ուժեղ կողմերին և արտահայտելով դրական կարծիքը:

Խիստ կարևոր է, որպեսզի մտերիմ մարդիկ աջակցեն մեզ և բարձրաձայն արտահայտվեն մեր դրական կողմերի և առանձնահատկությունների մասին:

 

Կարող եք միասին գնալ խանութ և ընտրել այնպիսի հագուստ, որը կընդգծի քո գեղեցկությունը և կքողարկի թերությունները: Կարող եք միասին ընտրել ոճային սանրվածք և մակիաժ, որ կընդգծի քո դիմագծերը և քո յուրահատկությունը 🙂

«Ես ամենահմայիչն եմ և ամենագրավիչը»

Մյուս խորհուրդը` կարևոր է սիրել և գնահատել ինքդ քեզ, այդ թվում նաև սիրել սեփական մարմինը: Չէ՞ որ ի շնորհիվ այդ մարմնի մենք կարող ենք քայլել, նստել, պարել, լողալ, սիրել և սիրված լինել և առհասարակ ապրել և վայելել կյանքը:

Ավելին, հարկավոր է ձեռք բերել ինքնավստահություն և ընդունել ինքդ քեզ: Իհարկե, սեփական ինքնագնահատականը բարձրացնելու համար անհրաժեշտ է որոշակի ջանքեր գործադրել: Ինքնավստահությունը միանգամից չի առաջանում, բայց քո գործադրած ջանքերը ի վերջո կտան լավ արդյունք:

Հիշո՞ւմ եք հայտնի սովետական կինոնկարը, որտեղ գլխավոր հերոսուհուն խորհուրդ տվեցին հաճախ կրկնել` «Ես ամենահմայիչն եմ և ամենագրավիչը» ☺️ Թվում է, ծիծաղելի և դատարկ բա՞ն է: Հնարավոր է, բայց այստեղ կա նաև խորը իմաստ: Հաճախ այդպիսի դրական դիրքորոշումը բավական արդյունավետ է, և նման վարժությունները պետք է դարձնել ամենօրյա սովորություն:

 

Ուրեմն, սեփական մարմինն ընդունելու համար բոլորովին պարտադիր չէ ունենալ կատարյալ արտաքին տեսք: Կարևոր է իմանալ, որ քո գլխավոր նպատակն է առողջ լինել և լավ ինքնազգացողություն ունենալ, իսկ մարդկանց էսթետիկ նախասիրությունները խիստ անցողիկ են և տարաբնույթ: Եվ չմոռանաս հավատալ այն բարի խոսքերին, որ դու ասում ես ինքդ քեզ 🙂 Այո′, չզարմանաս, բայց պարբերաբար պետք է ինքդ քեզ գովես:

Վստահ եղիր, որ նույնիսկ բավականին լուրջ ֆիզիկական առանձնահատկություններ և թերություններ ունեցող մարդը կարող է լինել առողջ, ինքնավստահ և զգալ իրեն երջանիկ: Պարաօլիմպիական խաղերի մասնակից մարզիկները (և շատ այլ հայտնի մարդիկ) քեզ լավ օրինակ: Ուրեմն, մի′ հուսահատվիր և հավատա′ քո ուժերին:

Ուրեմն ի՞նչ, երբեք չկաշկանդվե՞լ:

Այսպիսով, կան իրավիճակներ, երբ պետք է հաղթահարել սեփական անվստահությունը և ամաչկոտությունը, սակայն կան նաև իրավիճակներ, երբ պետք չէ քեզ կոտրել և դուրս գալ կոմֆորտի գոտուց: Բնականաբար, դու պետք է լսես ինքդ քեզ, իր ներքին ձայնը, ուշադրություն դարձնես մարմնի ազդանշաններին, և եթե զգում ես արտահայտված անհարմարություն` ֆիզիկապես կամ հոգեպես, համարում ես ինչ-որ բան խիստ անտեղի, չարժե քեզ կոտրել:

Իհարկե, որոշակի անհարմարության պահը պետք է փորձես հաղթահարել, որպեսզի կարողանաս առաջ գնալ, այսպես է տեղի ունենում ներքին աճը:  🙂

Ինչևէ, եթե դու ունես նրբանկատ և հասկացող ընկերներ, ապա ամաչկոտությունն ավելի հեշտ կհաղթահարես: Սակայն, եթե դու գտնվում ես լրիվ անծանոթ մարդկանց շրջապատում և համոզված չես, որ քեզ ճիշտ կհասկանան, ապա լավ կլինի խուսափել հնարավոր անհարմար իրավիճակներից:

Պետք չէ մոռանալ, որ մեր մարմինը փոփոխվում է կյանքի ընթացքում, և մարդու ինքնազգացողությունը և սեփական մարմնի ընկալումը ևս փոփոխվում են: Ի դեպ, հենց դեռահասային տարիքն է ամենակարևոր և խոցելի մարմնի ընկալման ձևավորման  համար:

Իսկ թե ինչպես դառնալ ավելի ինքնավստահ, կարդա′ մեր կայքի մյուս հոդվածներում:

 

Նյութի աղբյուր` https://ology.sh/healthygrowth/strakh-svoego-tela/: Նկարիչ` Կատյա Շեստակովա: