Երբ նայում ես քո սիրած դերասաններին, երգիչներին կամ այլ աստղերին, հազվադեպ ես հիշում, որ… նրանք «փայլուն» տեսք ունենալու և ֆոտոգենիկ լինելու համար շատ ժամանակ են ծախսում:

Չէ՞ որ իրականում գեղեցկությունը կախված է ոչ միայն բնական տվյալներից, այլ նաև ինքնազգացողությունից և մի շարք այլ բաներից: Մի պարզ օրինակ. սարսափելի ցավում է գլուխդ կամ փորդ: Դժվար թե կարողանաս ցուցադրել քո երջանկությունդ և զարմացնել գեղեցկությամբ: Կամ, օրինակ, եթե ատամներդ մաքրում ես ընդամենը շաբաթը մի քանի անգամ, արդյո՞ք կարելի է երազել «հոլիվուդյան» ժպիտի մասին:

Բայց փաստը մնում է փաստ: Երբ մենք երիտասարդ ենք, մեզ համար հատկապես կարևոր է ուշադրություն գրավել, գեղեցիկ երևալ և դուր գալ հակառակ սեռի ներկայացուցիչներին: Գուցե դա կյանքում ամենակարևորը չէ, բայց հաստատ շատ դուրեկան է: Իսկ օրգանիզմն այդ պահին, ցավոք, նոր «անակնկալ» է մատուցում. ճակատին պզուկ է հայտնվում հենց ժամադրությունից առաջ, կամ էլ նոր հագուստի մեջ ոչ մի կերպ չես մտնում: Եվ ինչպե՞ս կարող ես այս դեպքում վստահ զգալ քեզ:

Մենք փորձեցինք առանձնացնել հիմնական խնդրահարույց հարցերը և ելք գտնել դրանց լուծմանը: Փորձե՞նք:

Հոտ

Որքան էլ տարօրինակ թվա` քո կերպարի հիմնական բաղադրիչներից մեկն անտեսանելի է, սակայն ազդում է քո նկատմամբ շրջապատի վերաբերմունքի վրա: Մարդիկ հակված են չընդգծել դրա կարևորությունը, սակայն բուրմունքը կարող է բարձրացնել մեր տրամադրությունը (հարկավոր է չչարաշահել, որպեսզի շրջապատը չխեղդվի 🙂 ) և հակառակը` վանել ինչ-որ մեկի հետ շփվելուց:

Բոլորովին պարտադիր չէ օգտագործել շատ թանկ օծանելիք: Բավական է պահպանել հիգիենայի կանոններ, լվացվել օճառով, մաքրել ատամները, ժամանակին փոխել ներքնազգեստը, գուլպաները և հագուստը, և նման խնդիր չի առաջանա:

Եթե դու հետևում ես բոլոր կանոններին, իսկ տհաճ հոտը, օրինակ` բերանից չի վերանում, անհրաժեշտ է դիմել բժշկի` հնարավոր հիվանդությունը ախտորոշելու և խնդիրը վերացնելու նպատակով:

Մարմնակազմություն

• Ավելի առնական տեսք ունենալու նպատակով, տղաները հաճախ սկսում են մարզվել մարզասրահում: Որպեսզի մարզումները դրական արդյունք տան, ավելի լավ է խորհրդակցել մարզչի հետ. նա կհուշի, թե յուրաքանչյուր մկանային խումբ ինչպես պետք է մարզել, որպեսզի մարմինն առավել գեղեցիկ դառնա:
• Աղջիկներին սկսում է անհանգստացնել մարմնի քաշը, քանի որ դեռահաս տարիքում ճարպային բջիջների քանակը և մարմնի մկանային զանգվածը ավելանում են, աղջիկների մոտ լայնանում են կոնքերը, կազմվածքը դառնում է ավելի կանացի:

Եթե դու լրջորեն վերաբերվես ֆիզիկական վարժություններին, և սպորտը դառնա քո հոբբին, ապա շատ շուտով դու լավ տեսք կունենաս, և անշուշտ կծանոթանաս նոր և հետաքրքիր մարդկանց հետ:

Կրկին մարմնի քաշի մասին

• Գիրանալու վախից աղջիկներից շատերը «դիետա» են պահում, չնայած իրականում ավելորդ քաշ չունեն: Յուրաքանչյուր կալորիան հաշվելը, սիրած ուտելիքից հրաժարվելն ու գիշերը դրա մասին երազելը սթրես է օրգանիզմի համար: Ի պատասխան նման արհեստական «սովի»՝ օրգանիզմն ավելի շատ քաշ կկուտակի պաշտպանվելու նպատակով:

• Երբեմն գիրության պատճառ է հանդիսանում ֆիզիկական ակտիվության պակասը: Անհրաժեշտ է ավելի շատ շարժվել, մարզվել. դա կօգնի ամրացնել մարմնի որոշ մկաններ և նվազեցնել քաշը:

• Չափազանց խիստ մտահոգությունը սեփական քաշի մասին կարող է առաջացնել առողջական խնդիրներ, նպաստել անորեքսիայի զարգացմանը (այդ մասին կարդա Սննդային վարքագծի խանգարումներ հոդվածում): Եթե դու կարծում ես, որ քո վերաբերմունքը սննդի հանդեպ «խանգարում է ապրել», անհրաժեշտ է դիմել բժիշկ-մասնագետի օգնության:
• Մի′ օգտվիր քաշի նվազեցման տարօրինակ խորհուրդներ պարունակող վեբ-կայքերից: Դրանք քո առողջությանը մեծ վտանգ կարող են պատճառել: Դիմի′ր համապատասխան մասնագետի:

Մազերի վիճակը

Գեղեցիկ, լավ խնամված մազերը քո կերպարի կարևոր տարրն է: Այնպես որ շատ կարևոր է ժամանակ ծախսել դրանց խնամքի վրա:

• Հասունացման ընթացքում ճարպագեղձերի աշխատանքն ակտիվանում է, հետևաբար՝ մազերն ավելի արագ են կեղտոտվում: Դժվար է ասել, թե շաբաթական քանի անգամ պետք է լվանալ մազերը, քանի որ դա շատ անհատական է: Մի դեպքում անհրաժեշտ է գլուխը լվանալ երկու օրը մեկ, մյուս դեպքում՝ բավական է շաբաթը երկու անգամ: Կարևոր է թույլ չտալ, որ մազերդ կեղտոտ ու չսանրված լինեն:
• Մազերի փայլը, որակն ու ամրությունը բարելավելու բազմաթիվ միջոցներ կան՝ դիմակներ, կոնդիցիոներներ: Խորհրդակցիր ծնողներիդ կամ վարսահարդարի հետ, թե որ միջոցն է առավել արդյունավետ հենց քո վարսերին:
• Ընտրիր այնպիսի սանրվածք, որն առավելագույնս կընդգծի քո դեմքի առանձնահատկությունները: Սակայն կուրորեն մի հետևիր նորաձևությանը և ոչ մեկին մի կրկնօրինակիր: Այն, ինչ սազում է ուրիշին, գուցե ամենևին չգեղեցկացնի քեզ: Ավելի լավ է, խորհրդակցիր վարսավիրի հետ կամ նկարիր սանրվածքների մի քանի ձևեր և կցիր դրանք քո լուսանկարին, որպեսզի հասկանաս, թե որ տարբերակն է լավագույնս ընդգծում քո դեմքը: 🙂

Մազեր մարմնի վրա

Սեռական հասունացման շրջանում տղաների և աղջիկների մոտ մարմնի տարբեր մասերում առաջանում են մազեր: Սովորաբար, եթե պատանին սափրում է դեմքը, ընդունված է կարծել, որ նա սեռահասուն է: Բազմաթիվ երկրներում տարածված կարծիք կա, որ տղամարդը պետք է անպայման սափրի դեմքի մազերը, մինչդեռ, բեղերն ու մորուքը նաև կարող են դիտվել որպես տղամարդու իմաստության նշան և հպարտանալու առարկա: Ինչևէ, յուրաքանչյուր պատանու անձնական որոշումն է՝ սափրվել, թե ոչ: Ի վերջո, հարմարությունը և լավ ինքնազգացողությունն առավել կարևոր է:

Հաճախ աղջիկներին անհանգստացնում է մազակալումը անութափոսերում (թևատակերում), ոտքերին, ձեռքերին, երբեմն էլ դեմքին: Որոշ հիվանդությունների դեպքում աղջիկների մոտ կարող է նկատվել առատ մազակալում: Ցանկացած դեպքում մազերը հեռացնելուց առաջ անհրաժեշտ է խորհրդակցել բժիշկ-մասնագետի հետ:

Մաշկի վիճակը

Կորյակներն ու պզուկները մեծ խնդիր են բազում դեռահասների համար, ուստի.

• հետևիր դեմքի և մարմնի մաշկի մաքրությանը: Օգտագործիր հատուկ գելեր, մեղմ օճառներ կամ հատուկ մաքրող լոսյոններ:
• Աշխատիր մաշկը չափից ավելի չչորացնել (այդ թվում, չարժե հրապուրվել արևայրուքով), հակառակ դեպքում մաշկը կկորցնի իր բնական պաշտպանիչ շերտը, ինչը կառաջացնի մաշկային այլ խնդիրներ:
• Եթե մաշկի խնդիրները շատ են անհանգստացնում, դիմի՛ր բժիշկ-մաշկաբանին:

Կոսմետիկա

Աղջիկներից շատերը համոզված են, որ առանց կոսմետիկայի անհնար է լինել գեղեցիկ: Սակայն հաճախ այն խոչընդոտում է կատարելության հասնելուն, հատկապես, երբ չարաշահվում է:

Ակտիվ շպարը երիտասարդ դեմքի վրա անպատշաճ ու անտեղի է դիտվում: Ցերեկվա ժամերին գուցե հարկավոր է խուսափել շպար օգտագործելուց, սակայն, եթե շպարվելու ցանկությունն այնուամենայնիվ անդիմադրելի է, նախընտրելի է օգտագործել աչքերի ստվերաներկի չեզոք գույներ կամ շուրթերի փայլ: Չէ՞ որ այժմ քո առավելությունն երիտասարդությունն ու բնական գեղեցկությունն է, որ բոլորովին պետք չէ թաքցնել: Դեկորատիվ կոսմետիկան մաշկի խնդիրների լուծման մեթոդ չէ:

Պետք է հիշել, որ ցանկացած շրթներկ, աչքերի մատիտ և այլ կոսմետիկ պարագա պետք է լինի անհատական օգտագործման: Որքան էլ ընկերուհուդ հարազատ համարես, միևնույն է, կոսմետիկ պարագաները չպետք է նրա հետ ընդհանուր օգտագործես:

Եթե կորյակների և պզուկների խնդրին արդեն առնչվել ես, ապա ընդունիր, որ ավելի լավ է զերծ մնալ տոնային քսուքներից (կամ օգտագործել հատուկ միջոցներ` խորհրդակցելով բժիշկ-դիմահարդարի հետ): Դրանք ոչ միայն չեն քողարկի մաշկի թերությունները, այլ ընդհակառակը՝ ավելի կընդգծեն, նաև կփակեն մաշկի ծակոտիները: 🙁

Եվ հիշիր, որ դեկորատիվ կոսմետիկայի օգտագործման հիմնական նպատակը սեփական արժանիքներն ընդգծելն է, ոչ թե նոր դեմք «նկարելը»: 🙂

Ներքնազգեստ

Ներքնազգեստի հարմարությունը և որակը ազդում են մեր ինքնազգացողության վրա: Անհրաժեշտ է ընտրել այնպիսի ներքնազգեստ, որը կպահպանի վերարտադրողական օրգանների առողջությունը:

• Երիտասարդ տղաներին խորհուրդ չի տրվում մշտապես լողավարտիք հագնել: Ավելի լավ է սովորական վարտիք հագնել, նախընտրելի է՝ բնական գործվածքից: Բացի այդ, այն չպետք է չափազանց ձիգ լինի:
• Աղջիկները չպետք է կրեն «ստրինգներ», քանի որ դրանք կարող են հիվանդությունների առաջացման պատճառ դառնալ: Եթե դու, այնուամենայնիվ, նախընտրում ես «ստրինգ», ապա այն պետք է լինի բնական գործվածքից և անպայման ճիշտ չափսի (ոչ փոքր): Այն կարելի է կրել 6 ժամից ոչ ավել:

Հագուստ

Հագուստի թեմայով անվերջ կարելի է ծավալվել: Նորաձևության և գեղեցկության մասին յուրաքանչյուրս մեր սեփական պատկերացումներն ունենք: Այդուհանդերձ, կա մի կանոն, որ ճշմարիտ և ընդունելի է բոլոր դեպքերում. ինչ էլ հագնես, գեղեցիկ տեսք կունենաս, եթե քո հագուստը լվացած է, արդուկած, համապատասխանում է քո չափսերին, ընդգծում է քո արժանիքներն ու թաքցնում թերությունները:

Ընդ որում, կարևոր չէ, թե ինչ արժեք ունի հագուստդ: Նույնիսկ էժան, բայց ճաշակով ընտրված բլուզը կամ բաճկոնը կարող են շատ ավելի աչք շոյող ու դուրեկան լինել, քան թանկ դիզայներական, բայց անճաշակ ու աչք ծակող իրերը:

Ցանկալի է, որ հագուստը լինի բնական կտորից` բամբակյա, բրդյա, մետաքսյա, որոնք չեն քրտնացնում և հնարավորություն են տալիս մարմնին ազատ շնչել:

Որպեսզի ավելի լավ հասկանաս, թե ինչն է քեզ սազում, պետք է ձևավորես և զարգացնես սեփական ճաշակը: Դրա համար բավարար չէ պարզապես թերթել նորաձևության ամսագրերը: Իհարկե, դու հավանաբար ունես նմանակման քո օրինակները, որոնց ճաշակին վստահում ես և կատարյալ համարելով` ջանում ես նմանվել: Սակայն չարժե կուրորեն կրկնօրինակել այն ամենը, ինչ քո կուռքերն են անում և կրում: Սեփական ոճով ընտրված հագուստը քո անհատականության արտահայտման միջոցներից մեկն է, մինչդեռ ուրիշին կրկնօրինակելով` դու կորցնում ես քո անհատականությունը: 🙁

Եվ մի՛ վախեցիր սխալվել: Սեփական ոճը փնտրելիս բոլորն էլ կարող են սխալվել: Կարևորը դա ժամանակին նկատելն ու կանխելն է: 🙂

Քո քաշից ու տեսքից առավել կարևոր է քո ինքնազգացողությունն ու ներդաշնակությունը սեփական «ես»-ի հետ: Այնուհանդերձ, աշխատի՛ր, որ լավ ֆիզիկական վիճակի պահպանումն ու հիգիենան դառնան սովորական երևույթ: Միայն այդ դեպքում դու քեզ դուր կգաս հայելու մեջ, և ամեն անգամ հանրությանը ներկայանալը քեզ համար կվերածվի ոչ թե պատժի, այլ իսկական տոնի:

Նկարները հոդվածի համար մենք վերցրել ենք այստեղ, այստեղ, այստեղ, այստեղ, այստեղ, այստեղ և այստեղ:

Կարդացեք նաև

Ինչպե՞ս հասկանալ սեփական մարմինը

Մարդիկ հաճախ մտածում են, որ իրենց մարմինը սովորական մի մեխանիզմ է և անտեսում են նրա պահանջները: Օրինակ` ցավ զգալով, չեն խմում դեղ, «դիմանում են»: Իրականում նման վերաբերմունքը բավականին վտանգավոր է, անկախ թե տանջող ախտանիշները կապված են հիվանդության, թե գերհոգնածության հետ: Բոլոր դեպքերում չարժե անտեսել անհանգստացնող նշանները: Չէ՞ որ, ի վերջո ստիպված կլինես դիմել օգնության: Ուրեմն, ինչպե՞ս հասկանալ սեփական մարմինը: Կարդա՛ այս հոդվածում:

ավելին →

Լայֆհաքերի շարքից. ինչպե՞ս անվտանգ օգտվել զուգարանից

Հաճախ լսում ես կարծիքներ, որ հանրային զուգարանները տարբեր վտանգավոր մանրէների աղբյուր են, և ավելի լավ է խուսափել դրանցից: Մինչդեռ կան պարզ կանոններ, որոնց հետևելով` կարող ես անվտանգ դարձնել զուգարան գնալը և խուսափել հնարավոր վարակներից:

ավելին →

Ինչպես օրվա տևողությունը երկարացնել 4 ժամով կամ վաղ առավոտյան արթնանալու մի քանի պատճառ

«Ոչ մի կերպ չեմ կարողանում հագենալ քնից», «Ժամանակը չի հերիքում անհրաժեշտ գործերն անելու համար», «Ես նորից քնով եմ անցել», «Ես ինձ շատ հոգնած և թույլ եմ զգում». ծանոթ արտահայտություննե՞ր են: Գերծանրաբեռնվածությունը մեր ժամանակների ամենատարածված խնդիրներից է: Եթե ուզում ես իմանալ՝ ինչպես պայքարել դրա դեմ, ապա կարդա այս նյութը:

ավելին →

Զուտ աղջկական գաղտնիքներ

Մանկության տարիներին, արքայադուստր դառնալու համար բավական էր ունենալ շքեղ զգեստ, գեղեցիկ վարսեր, իսկ երբեմն էլ` միայն հասարակ ստվարաթղթե թագ գլխին: Արքայադուստր լինելու ցանկությունը տարիքի հետ չի անհետանում, բայց դրան հասնելը դառնում է ավելի դժվար, քանզի հայտնվում են սեփական խնամքի հետ կապված նոր խնդիրներ: Կարդա՛ մեր խորհուրդները և զգա՛ քեզ վստահ:

ավելին →