Աղջիկներին չես հասկանա. մեկ աղջիկը կոպիտ ու ագրեսիվ է` ֆուտբոլային երկրպագուի նման, մեկ էլ հանկարծակի փոխակերպվում է թախծոտ հայացք ունեցող քնքուշ մի արքայադստեր, որն երազկոտ հայացքով նստած է պարտեզում լուսնի լույսի տակ: Եվ ինչպե՞ս հասկանալ, թե ինչ գործողությունների է նա քեզանից սպասում:

Կարծես թե դուք իրար վաղուց և շատ լավ եք ճանաչում, շատ ժամանակ եք անցկացնում իրար հետ, և բոլոր կարևոր խոստովանություններն արդեն արված են: Սակայն, դու այդպես էլ չհասկացար, աղջիկը պատրա՞ստ է ավելի խորը և մտերիմ հարաբերությունների, անելու կարևոր «վերջին» քայլը: Կամ ամեն ինչ հակառակն էր. մտածելով, որ գրկելը, հպվելը, համբուրելը հաճելի է աղջկա համար, դու որոշեցիր կրկնապատկել քո ջանքերը: Իսկ արդյունքում տեսար արցունքներ:

Ահա  մի քանի խորհուրդներ, որոնք կօգնեն քեզ վստահ լինել, որ դու ամեն ինչ ճիշտ ես անում.

• մի՛ ստիպիր աղջկան ունենալ սեռական հարաբերություն, եթե նույնիսկ քեզ թվում է, որ նրա ուզածը դա է: Երբեք ուժ մի՛ գործադրիր կանանց և աղջիկների նկատմամբ:
• Եթե աղջիկն ասում է «ո՛չ», միանգամից դադարեցրու սեռական բնույթի ակնարկները կամ գործողությունները: Մի՛ փորձիր գուշակել նրա խոսքի իմաստը, ավելի լավ է` ուղղակի նրան հարցնել:
• Մի՛ եղիր պնդերես և կպչուն: Քո չափազանց սիրալիր և փաղաքշական սիրահետումը նա կարող է ընկալել իբրև սպառնալիք:
• Հիշի՛ր, որ սեռական հարաբերությունները չեն ենթադրում կռիվ կամ պայքար: Եթե քո համար աղջկա հետ հարաբերությունների հիմնական նպատակը նրան հաղթելն է և ուզածիդ հասնելը, ուրեմն դու ավելի մոտ ես բռնության, քան կարծում ես: Սեքսը մրցում չէ: Այստեղ չկան և չեն կարող լինել հաղթողներ և պարտվողներ:
• Սեռական հարաբերությունը չի կարող լինել ժամադրությունների ընթացքում քո ծախսած գումարի կամ ուշադրության համար փոխհատուցում:
• Չարժե սեռական հարաբերություն ունենալ աղջկա հետ, եթե նա հարբած է կամ թմրամիջոցի ազդեցության տակ է: Սթափվելով` նա կարող է քեզ մեղադրել բռնաբարության մեջ, և դու ստիպված կլինես այդ արարքի համար կրել քրեական պատասխանատվություն:
• Եթե ընկերդ քեզ առաջարկում է սեռական հարաբերություն ունենալ իր ընկերուհու հետ, երբեք մի՛ համաձայնվիր: Միայն աղջիկն ինքը կարող է այդպիսի որոշում կայացնել, տնօրինել սեփական մարմինը` համաձայնվելով կամ հրաժարվելով սեռական հարաբերությունից:

Սեքսի առկայությունը քո կյանքում երբեք չի դարձնի քեզ իսկական տղամարդ, մինչդեռ աղջկա նկատմամբ ուշադիր և նրբազգաց վերաբերմունքը և նրան պարգևած ապահովության զգացումը (սա ստուգված բան է) կօգնի քեզ զգալ քո տղամարդ լինելը:

Ուրեմն, եթե քեզ թվում է, որ դու ամեն ինչ ճիշտ ես անում, ուժով ցույց ես տալիս քո սիրահարվածությունը, քո «տղամարդ» կամ «լավ տղա» լինելը, հիշի՛ր վերևում թվարկած մի քանի կետերը: Այդ դեպքում դու կարող ես չվախենալ բռնության մեջ մեղադրվելուց: Հակառակ պարագայում կարող ես շատ արագ հայտնվել բանտում, նույնիսկ անչափահաս լինելով:

Ֆոտոն գտել ենք այստեղ:

Կարդացեք նաև

Ինչպես գրավել տղայի ուշադրությունը. առաջին քայլեր

Մեր հասարակությունում ընդունված է, որ հենց տղան պետք է լինի նախաձեռնող աղջկա հետ ծանոթության ժամանակ: Իսկ ի՞նչ անել, եթե նա քեզ շատ է դուր գալիս, բայց հասկանալի չէ, թե ինչպես է նա քեզ վերաբերվում, և արդյո՞ք զգացումներդ փոխադարձ են: Ինչպե՞ս գրավել տղայի ուշադրությունը և ավելի մոտիկից ծանոթանալ նրա հետ: Կարդա մեր հոդվածում:

ավելին →

Ինչպես վերապրել սիրո կորուստը

Դուք վաղուց եք իրար ճանաչել, ընկերություն եք արել, հետո հանկարծ նա առաջարկեց հանդիպել: Եվ ամեն ինչ հրաշալի էր, ինչպես հեքիաթում... Մինչ այն օրը, երբ նա անսպասելիորեն հայտնեց, որ մեկնում է այլ երկիր, որտեղ նրա կյանքը լրիվ այլ է լինելու, իսկ դուք կարող եք մնալ ընկերներ....Ցավալի է, վիրավորական, սակայն այս իրավիճակը դու չես կարող փոխել: Ինչպե՞ս վերապրել ձեր բաժանումը: Ինչպե՞ս համակերպվել առաջին, իսկական սիրո կորստի հետ:

ավելին →

Շփում ծնողների հետ: Ինչպես կառուցել նոր հարաբերություններ

Ինչպե՞ս ապրել առանց վիճելու ծնողների հետ և միևնույն ժամանակ նրանց հասկացնել, որ կան բաներ, որոնցից դու ինքդ կարող ես գլուխ հանել, բայց և երբեմն ունենում ես նրանց կարիքը: Եվ ինչպե՞ս անել, որ օգնության դիմաց նրանք չթելադրեն քեզ իրենց պայմանները:

ավելին →

Ինչպես դառնալ լավ ընկեր

Զարմանալի է, բայց փաստ է, որ ոչ ամեն մեկը կարող է լինել լավ ընկեր: Ցավոք, դա սովորելն այդքան հեշտ չէ: Ահա մի քանի պարզ և գործուն խորհուրդներ, որոնք կօգնեն գտնել նոր ընկերներ և պահպանել լավ հարաբերությունները հին ընկերների հետ:

ավելին →