7 գաղափար ամառային ռոմանտիկ հանդիպումների համար
Հասի՛ր ինձ, եթե կարող ես
Եթե դուք երկուսդ էլ վարում եք հեծանիվ, ապա առանց երկար մտածելու` գնացի՛նք: Համատեղ հեծանվային զբոսանքը ոչ միայն շատ օգտակար է առողջության համար, այլ նաև բավականին ռոմանտիկ: Դուք միասին կարող եք բացահայտել ձեր քաղաքի/ համայնքի հետաքրքիր վայրերը կամ գնալ քաղաքից դուրս: Դուրս եկեք վաղ առավոտյան, չմոռանաք վերցնել ջուր, համով բաներ, որպեսզի կանգ առնեք գեղեցիկ վայրում կամ բնության գրկում և կազմակերպեք հաճելի պիկնիկ:
Կինո բաց երկնքի տակ
Քաղաքային որոշ այգիների ամառային կինոթատրոններում երեկոյան ցուցադրվում են ֆիլմեր` բաց երկնքի տակ: Կամ կարող ես ինքդ ամեն ինչ կազմակերպել. ձեր սիրելի կինոֆիլմի դիտում` երկուսիդ համար: Պատրաստիր պոպկորն և մտածիր ոչ ավանդական ինտերակտիվ անակնկալներ: Օրինակ` կարող եք հերթով գուշակություններ անել ձեր սիրած ֆիլմի ընթացքում. պահեք որևէ թիվ և միացնելով ֆիլմը հենց մտապահած րոպեին, լսեք ձեր կանխագուշակությունը:
Համտեսելու ժամանակն է
Կարող ես կազմակերպել զվարճալի համեղ անակնկալ: Նախապես գնիր տարբեր տեսակի մրգեր և հատապտուղներ (ինչքան շատ տեսակի, այնքան ավելի լավ է), կտրատիր և առաջարկիր քո ընկերոջը (-ուհուն) կապած աչքերով փորձել և գուշակել` ինչ է ուտում: Զվարճանքն ապահովված է 🙂
Կարող ես բարդացնել առաջադրանքը և առաջարկել գուշակել քո ձեռքով պատրաստած սմուզիի բաղադրությունը:
Ամառային ֆոտոսեսիա
Եթե ունեք պրոֆեսիոնալ տեսախցիկ, կարող եք կազմակերպել համատեղ ֆոտոսեսիա: Այն կյանքի կոչելու համար կարող եք դիմել ընկերների օգնության: Հետաքրքիր կադրեր ստանալու համար հագնվեք մի ոճի մեջ, կամ կրեք նույն գույնի հագուստ, կամ ընդհանուր աքսեսուարներ, որպեսզի ստանաք զույգի տեսք («family look»):
Համացանցում կարող ես փնտրել և գտնել զվարճալի կամ ոճային լուսանկարների համար յուրօրինակ գաղափարներ և համապատասխան պատրաստի բուտաֆորիա, որը կօգնի ավելի հետաքրքիր և յուրահատուկ դարձնել կադրերը:
Ռոմանտիկ ընթերցանություն
Ընտրեք ձեր սիրած գիրքը և միասին կարդացեք, դուրս գրեք հետաքրքիր մտքեր կամ ձեզ դուր եկած ցիտատները, կիսվեք տպավորություններով: Դարձրեք այդ զբաղմունքը լավ ավանդույթ, և տարիներ անց կունենաք համատեղ գրադարան և լիքը ջերմ հիշողություններ:
Կարող եք միասին կազմել ձեր սիրո օրագիրը` նոթատետրի մեջ գրի առնելով իրար ուղղված սիրո խոստովանությունները, ուղերձները, սիրած բանաստեղծությունները կամ երգերը, թերթերի միջև չորացրեք ծաղիկներ (որ հավաքել էիք ձեր հեծանվային զբոսանքի ժամանակ 🙂 ), սոսնձեք հաջողված համատեղ լուսանկարները:
Ջրավազանի տիրակալները
Եթե ձեր համայնքում կա ջրամբար կամ գետ, հրաշալի է: Եթե ոչ` միասին այցելեք լողավազան կամ ջրաշխարհ և լավ ժամանակ անցկացրեք ամռան տապից հեռու: Իսկ ընդմիջումներ անելիս` ապագա ճամփորդությունների պլաններ կազմեք:
Սակայն մի՛ մոռացեք անվտանգության մասին, արևի տակ պարտադիր կրեք արևային ակնոց, գլխարկ, օգտագործեք արևապաշտպան քսուքներ:
Հետաքրքիր քվեստ
Կարող ես թաքցնել մի անակնկալ փոքրիկ նվեր և ընկերոջդ/ ընկերուհուդ առաջարկել հետաքրքիր քվեստ`այն գտնելու համար: Ձեզ ծանոթ և ձեր սիրո պատմության համար հիշարժան վայրերում տեղադրիր համապատասխան հուշումներ: Իսկ քվեստի վերջում հանդիպեք ձեր սիրելի սրճարանում և պաղպաղակի ուղեկցությամբ միասին քննարկեք քվեստի արդյունքները և ստացած տպավորությունները:
Հույսով ենք, մեր գաղափարները ոգեշնչեցին քեզ մտածելու այլ հետաքրքիր համատեղ զբաղմունքներ երկուսի համար: Գաղափարները կարող են լինել շատ մատչելի և չպահանջել մեծ գումարներ կամ բարդ պատրաստություններ: Հաճախ բավական է սիրած մարդուն նվիրել հաճելի փոքրիկ գրառում` սիրո գեղեցիկ խոստովանությամբ, որպեսզի նրա դեմքը ամբողջ օրվա ընթացքում փայլի անկեղծ բարի ժպիտով:
Նկարի համար շնորհակալ ենք այս աղբյուրին, gif-անիմացիայի համար` այս:
Հոդվածը կազմեց Սվետլանա Վերտոլան:
Կարդացեք նաև
Ռոմանտիկան ամառային ճամբարում
Անակնկալ նվերների գաղափարներ Վալենտինի օրվա կապակցությամբ
6 խորհուրդ տղաներին` աղջկա հետ ծանոթանալու համար
