Դանիան ավանդաբար համարվում է աշխարհի ամենաերջանիկ երկիրը: Ինչո՞ւ են դանիացիներն ավելի երջանիկ, համեմատած Արևմտյան Եվրոպայի այլ բարեկեցիկ երկրների հետ: Չմոռանանք, որ Դանիայում բավականին ցուրտ եղանակ է, քիչ են արևոտ օրերը, թանկ է կյանքը և բարձր են հարկերը … Ինչո՞ւմն է գաղտնիքը:

Այստեղ դեր են խաղում ոչ միայն սոցիալ-տնտեսական կարգավիճակը և բարձր կենսամակարդակը, այլ հատուկ մոտեցումը, որը թույլ է տալիս ստանալ հաճույք և բավարարվածություն ամենապարզ առօրյա բաներից: Այդ հայեցակարգը կամ փիլիսոփայությունը կոչվում է «հյուգե»:

Ըստ դանիացի գրող Մայք Վիկինգի` հյուգեն ունի մի շարք կանոններ, որոնց հետևելով կարելի է ապահովել դրական հույզեր, բարեհամբույր և բարյացակամ մոտեցում և կյանքից բավարարվածություն:

Եվ այսպես, թվարկենք այդ կանոնները:

1. Հաճույք ստացեք պարզ բաներից.

Սովորեք գնահատել կյանքի իրական երջանկության պահերը` գեղեցիկ բնությունը, երեխայի անկեղծ ծիծաղը, բարի ժպիտը, մտերիմ մարդու ջերմությունը, հետաքրքիր գիրքը … Գնահատեք ոչ թե նյութականը, այլ նման փոքր երջանիկ պահերը: Եվ առհասարակ, սովորեք հաճույք ստանալ անգամ մանրուքներից:

Նույնիսկ ամենածանր և զբաղված աշխատանքային օրերին փոքրիկ ընդմիջումներ արեք և վայելեք հանգիստը:

Նվիրեք ձեզ 5-ից 10 րոպե յուրաքանչյուր 2-3 ժամը մեկ: Մի մնացեք ձեր աշխատասեղանի մոտ նստած, բարձրացրեք գլուխը համակարգչի կամ սմարթֆոնի էկրանից: Դուրս եկեք բակ կամ փողոց, խմեք թեյ կամ սուրճ, անջատեք հեռախոսը կամ գոնե մի պատասխանեք գործնական զանգերին և նամակներին:

2. Եղեք ավելի ակտիվ.

Մենք բազմիցս ենք խոսել ֆիզիկական վարժանքների կարևորության մասին: Եթե դուք ամեն օր օգտվում եք տրանսպորտից կամ մեքենայով եք հասնում աշխատավայր կամ դասի, առնվազն շաբաթը մեկ դա արեք ոտքով կամ հեծանվով: Եթե չկա այդ հնարավորությունը, գոնե շաբաթ-կիրակի օրերին դուրս եկեք զբոսանքի կամ գնացեք արշավ, այցելեք լողավազան կամ սպորտային խմբակ ընտանիքի անդամների և ընկերների հետ միասին: Դա թույլ  կտա լիցքաթափվել և «անջատել» ուղեղը:

3. Մի՛ ամաչեք ձեր զբաղմունքներից և մի՛ թաքցրեք ձեր հույզերը.

Մի՛ զսպեք ձեր իրական հույզերը: Երբ զգում եք դրա կարիքը, կարող եք լացել, գոռալ, եթե վիճել եք ընկերոջ կամ հարազատի հետ և ուզում եք հաշտվել, անպայման արե՛ք դա` առանց հապաղելու:

4. Գտեք ձեր հոբբին.

Սիրելի զբաղմունքը կօգնի ձեզ դրսևորվել և հանգստանալ, կտա շատ դրական լիցքեր: Օրինակ` փոքր տարիքից սիրել եք նկարել և ցանկացել եք դա անել ավելի պրոֆեսիոնալ: Գնեք մատիտներ կամ ներկեր կամ գրանցվեք նկարչության դասընթացին: Հատկացրեք շաբաթական 1-2 ժամ նկարչության կամ ձեր նախընտրած զբաղմունքի համար` առանց շեղվելու տան գործերի կամ աշխատանքի/ դասերի վրա:

5. Պատրաստեք համեղ ուտեստներ և հաճույք ստացեք սննդից.

Սնվեք հաճույքով, կերեք առանց շտապելու: Եթե սովոր եք ուտել շատ արագ, ոտքի վրա, պարտադիր փոխեք այդ սովորությունը` ավելացնելով սնվելուն հատկացրած ժամանակը շուրջ երկու անգամ: Սնվեք առողջ, բայց ժամանակ առ ժամանակ կարող եք ձեզ թույլ տալ ուտել համեղ մի բան «չթույլատրված» սննդատեսակների ցանկից 🙂

Ինչևէ, մի՛ մոռացեք չափի մասին, հյուգեն ենթադրում է նաև չափ ու սահմանի ճանաչում:

6. Փոփոխություններ կատարեք ձեր ինտերյերում` դարձնելով այն ավելի հարմարավետ.

Դանիացիները նախընտրում են բաց գույներ, բնական նյութեր և գործվածքներ, հաճելի մանրուքներ, մեղմ լուսավորություն: Կարող եք պարզապես փոխել սեղանի կամ կահույքի դասավորվածությունը, պատերի երանգները կամ նկարները, ավելացնել վառ գույներ: Կարող եք սենյակում ավելացնել սիրելի լուսանկարներ, գրքեր կամ մոմեր: Անկողինը կամ բազմոցը ծածկեք գեղեցիկ ծածկոցով և տեղադրեք տարբեր ձևերի բարձեր:

7. Հյուրեր հրավիրեք.

Վե՛րջ տվեք սոց.ցանցերի միջոցով շփումներին: Ընկերների, մտերիմ և հարազատ մարդկանց հետ աշխատեք շփվել առերես: Հանգստյան օրերին կազմակերպեք ընտանեկան հանդիպումներ, երեկույթներ և կիրակնօրյա ճաշեր կամ պարզապես հավաքվեք միասին և խաղացեք սեղանի խաղեր: Եվ չմոռանա՛ք անջատել հեռախոսները:

8. Կրեք հարմարավետ հագուստ և կոշիկ.

Հարվարավետությունը հյուգեի կարևորագույն գաղափարն է: Ժամանակակից նորաձևությունը թելադրում է հյուգե ոճը: Չէ՞ որ այսօր շատ նորաձև են բնական գործվածքները և հագուստի հարմարավետությունը 🙂

Հուսով ենք, նշված խորհուրդները կօգնեն ձեզ դարձնել կյանքն ավելի հարմարավետ ու հաճելի և գնահատել հարազատ մարդկանց կամ ձեր սիրելի զբաղմունքի ուղեկցությամբ անցկացված ամեն րոպեն:

Փորձե՛ք ապրել համերաշխ ինքներդ ձեր և շրջապատող աշխարհի հետ:

Կարդացեք նաև

Ինչպես վիճել քաղաքավարի

Քեզ ծանո՞թ է այն զգացումը, երբ անհամաձայնությունը զրուցակցիդ հետ այնքան մեծ է, որ թվում է, թե մնում է միայն բղավել կամ էլ կտրուկ ավարտել զրույցը: Երկու տարբերակներն էլ լավագույնը չեն: Ուրեմն, ինչպե՞ս չհամաձայնվել մարդու հետ, մնալով հաճելի զրուցակից: Բերենք մի քանի տարբերակներ, որոնք կօգնեն չհամաձայնվել` մնալով քաղաքավարի:

ավելին →

Ինչպես վերապրել սիրո կորուստը

Դուք վաղուց եք իրար ճանաչել, ընկերություն եք արել, հետո հանկարծ նա առաջարկեց հանդիպել: Եվ ամեն ինչ հրաշալի էր, ինչպես հեքիաթում... Մինչ այն օրը, երբ նա անսպասելիորեն հայտնեց, որ մեկնում է այլ երկիր, որտեղ նրա կյանքը լրիվ այլ է լինելու, իսկ դուք կարող եք մնալ ընկերներ....Ցավալի է, վիրավորական, սակայն այս իրավիճակը դու չես կարող փոխել: Ինչպե՞ս վերապրել ձեր բաժանումը: Ինչպե՞ս համակերպվել առաջին, իսկական սիրո կորստի հետ:

ավելին →

Երբ քեզ օգնություն է հարկավոր…

Պատահում են իրավիճակներ, երբ ինքնուրույն գլուխ հանել չես կարող և ստիպված ես դիմել ուրիշների օգնության: Բայց միշտ չէ, որ այդքան հեշտ է օգնություն խնդրել ուրիշներից: Մեկին խանգարում է ամոթի զգացումը, մյուսը սովոր է սեփական ուժերով հարց լուծել, մեկ ուրիշը չի ցանկանում սեփական «թուլությունը» ցույց տալ: Երբեմն շրջապատողներն իրենք են օգնության ձեռք մեկնում, իսկ մենք շնորհակալություն ենք հայտնում և մերժում: Ինչու՞ ենք այսպես անում:

ավելին →