Ներլվացումը նախատեսում է հեշտոցի լվացում դեղորայքային լուծույթներով: Սովորաբար ներլվացում նշանակվում է բժիշկի կողմից` արգանդի, արգանդափողերի, հեշտոցի բորբոքային հիվանդությունների ժամանակ: Սակայն դրա կիրառումը ինքնաբուժման նպատակով ռիսկային է, քանզի հնարավոր է վարակի տարածում: Պետք չէ նաև ներլվացում կատարել գինեկոլոգին այցելելիս: Նման հիգիենիկ միջոցառումները կարող են խախտել բորբոքային հիվանդության իրական պատկերը:
Ոչ մի դեպքում չի կարելի իրականացնել ներլվացում.
- սեռական օրգանների սուր բորբոքային հիվանդությունների դեպքում,
- դաշտանի և հղիության ժամանակ,
- ծննդաբերությունից կամ աբորտից հետո` առաջիկա շաբաթների ընթացքում:
Ներլվացման օգտագործումը հիգիենիկ նպատակներով անարդյունավետ է, քանի որ հանգեցնում է հեշտոցի բնական միկրոֆլորայի խախտման, ինչն իր հերթին կարող է նպաստել չորության և սնկային հիվանդությունների առաջացման:
Գոյություն ունի մի թյուր կարծիք, որ սեռական հարաբերություններից հետո ներլվացումը կանխում է հղիությունը: Իրականում դա այդպես չէ, ավելին, նման գործողությունները կարող են նպաստել արտարգանդային հղիության զարգացմանը և վտանգել աղջկա կյանքը: