Իմ առնանդամի մաշկի տակ հավաքվում է սպիտակ նյութ, երբեմն` տհաճ հոտով, գնդիկների կամ բյուրեղիկների նման: Արդյո՞ք սա վարակ է: Ի՞նչ քսուք պետք է օգտագործել
Խոսքը հավանաբար գնում է առնանդամի գլխիկը ծածկող մաշկի (թլիփի) տակ հավաքվող
սպիտակ նյութի մասին: Այդ նյութը կոչվում է սմեգմա: Դա բնական փափկացուցիչ նյութ է, որն արտադրվում և հավաքվում է թլիփի տակ՝ նուրբ գլխիկը օծելու, լորձաթաղանթը փափուկ պահպանելու նպատակով: Կարիք չկա անհանգստանալու և ինչ-որ քսուք օգտագործելու համար: Այդ արտադրությունը պարզապես պետք է ամեն օր լվանալ սովորական գոլ ջրով՝ թլիփի մաշկը զգուշությամբ մի փոքր հետ քաշելուց հետո:
Եթե ամենօրյա պատշաճ հիգիենիկ խնամք չի ապահովվում, կուտակված նյութը կարող է տհաճ հոտ ունենալ, քանի որ նպաստավոր պայմաններ են ստեղծվում մանրէների բազմացման համար:
Պետք չէ օգտագործել հակաբակտերիալ օճառ` մաշկի գերչորացումից խուսափելու համար: Հարկավոր է գոլ ջուր և մեղմ մանկական օճառ: