Անակնկալ նվերների գաղափարներ Վալենտինի օրվա կապակցությամբ
Ռոմանտիկ հաղորդագրություն
Նախապես մտածիր ռոմատիկ տեքստի բովանդակությունը, գեղեցիկ ձևավորիր, օրինակ` տեղադրիր ծրարների մեջ և փոքրիկ անակնկալ հուշանվերի ուղեկցությամբ դիր ընկերոջդ պայուսակի, բլոկնոտի կամ բաճկոնի գրպանի մեջ: Որպես հուշանվեր կարող է ծառայել օրինակ` փոքրիկ բանալի («քո սրտի բանալին»), գեղեցիկ փետուր («հրեշտակի թևից»), չորացած ծաղիկ («առաջին ծաղկեփնջից») կամ այլ սիմվոլիկ մի բան: Հաղորդագրությունների մի մասը կարող ես ուղարկել սոց.ցանցերով: Այսպիսով, քո սիրելին օրվա ընթացքում մի քանի անգամ կստանա ռոմատիկ անակնկալներ և կհիշի ձեր հանդիպումները:
Պարգևատրում
Համացանցը լի է գեղեցիկ շաբլոններով, որոնք կարող ես օգտագործել քո սիրած մարդու համար յուրօրինակ պարգևագիր պատրաստելու համար` «Ամենահմայիչ ժպիտի», «Ամենագեղեցիկ աչքերի», «Ամենաբարի սրտի համար» և այլն: Ընտրություն կատարելիս` մտածիր հիմնավորումներ, թե ինչու ես հենց այս «անվանակարգում պարգևատրում» ընկերոջդ/ ընկերուհուդ, և անպայման ասա այդ մասին նրան նվերդ հանձնելիս:
Ձեր համատեղ հուշերի ալբոմ
Մի նոթատետրի մեջ սոսնձիր ձեր ընդհանուր նկարները և համատեղ ժամանցի իրադարձությունների մասին հուշերը, ձեր ռոմանտիկ նամակները, առաջին ժամադրություններից պահպանված կինոյի կամ թատրոնի տոմսերը: Բոլորի տակ կարճ գրանցումներ արա, իսկ հետո կազմակերպիր ձեր հարաբերությունների հիշատակի երեկո:
Երաժշտական ոգեշնչում
Եթե դու լավ երգում ես, կարող ես մի քանի երգեր ձայնագրել` ստեղծելով հատուկ երգացանկ, այն երաժշտությունից, որ կապված է ձեր հարաբերությունների հետ: Դուք կարող եք այն լսել միասին կամ ռոմանտիկ երեկոյի ժամանակ պարել այդ երգերի տակ:
Քաղցր անակնկալ
Ստեղծիր թեմատիկ քաղցր հավաքածու: Օրինակ` արկղիկի կամ զամբյուղի մեջ լցրու միայն դեղին գույնի քացրավենիք և մրգեր և ամրացրու «իմ արևին» վերնագրով փոքրիկ բացիկ 🙂 : Քո անակնկալ նվերով կարող ես ընդգծել ընկերուհուդ կամ ընկերոջդ հետաքրքրությունները կամ մասնագիտությունը` նվիրելով հատուկ ձևավորված «քաղցր ծաղկեփունջ» (sweet design տեխնիկան կիրառելով) կամ օրինակ` գնդակի/ շահմատի (սպորտսմենների համար) կամ ջութակի/ դաշնամուրի (երաժշտի համար) տեսք ունեցող տորթ:
Ֆիլմ ձեր երկուսիդ մասին
Եթե դու տիրապետում ես համակարգչային ծրագրերին, կարող ես ինքնուրույն ստեղծել տեսաֆիլմ ձեր հարաբերությունների մասին: Հավաքիր ամենահաջողված և կարևոր լուսանկարները և տեսագրությունները և պատրաստիր յուրահատուկ ֆիլմ: Կարող ես օգտագործել պատրաստի ծրագրեր, օրինակ` Movie Maker-ով, հաստատ ինքնուրույն գլուխ կհանես 🙂 : Ուղարկիր այն ընկերոջդ: Հավաստիացնում ենք, անակնկալդ դեռ շատ երկար կհիշվի:
Մեր սիրո մասին գիտեն ամբողջ աշխարհում
Եթե դու ունես լավ ծանոթներ տարբեր քաղաքներում և երկրներում, կարող ես յուրահատուկ նվեր պատրաստել: Խնդրիր նրանց նկարվել իրենց քաղաքի ամենահետաքրքիր և հայտնի տեսարժան վայրում` պահելով մի թուղթ, որի վրա գրված կլինի, օրինակ` «նույնիսկ Փարիզում/ Լոս Անջելեսում/ Մոսկվայում գիտեն, որ Արմենը սիրում է Անահիտին» կամ նման մի տեքստ:
Այդ բոլոր նկարներից պատրաստիր կոլաժ և ուղարկիր այն ընկերոջդ:
Ձեր սիրո փազլ
Ձեր ամենահաջողված նկարից պատրաստիր փազլ (կարող ես պատվիրել ֆոտոսրահում կամ փորձիր անել ինքդ) և հետո առաջարկիր ընկերոջդ միասին այն հավաքել: Բացի նկարից, հետաքրքիր փազլ կարող ես պատրաստել սիրո մասին մի ռոմանտիկ արտահայտությունից, որը նախապես տպիր կոշտ գունավոր թղթի վրա և հետո` կտրատիր: Եթե դու ինքդ ես պատրաստելու այդ նվերը, ապա մինչ կտրելը ետևի կողմին գրիր մի ռոմանտիկ արտահայտություն, իսկ փազլը հավաքելուց հետո ընկերոջդ/ընկերուհուդ ուշադրությունը դարձրու նաև երկրորդ անակնկալի վրա:
Ինտելեկտուալ անակնկալ
Կազմիր յուրօրինակ խաչբար` հիմնված ձեր հարաբերությունների կարևոր իրադարձությունների վրա: Պատասխանները կարող են լինել, օրինակ`
- ձեր մականունները
- այն ամիսը, երբ իրար հանդիպեցիք
- ձեր միասին այցելած առաջին սրճարանի անվանումը
- ձեր սիրված երգը
- նրա առաջին նվիրած ծաղիկների անվանումը
- կինոն, որ միասին դիտեցիք առաջին ժամադրության ընթացքում
Տարբերկաները շատ են, իսկ եթե միացնես երևակայությունդ, կարող ես մտածել բանալի բառ, որը տեսանելի կլինի խաչբառն ամբողջությամբ լուծելու դեպքում:
Սիրո խոստովանություն
Կարծում ենք, դասական է հանդիսանում սիրո գեղեցիկ խոստովանությունը` սիրելի աղջկա տան մուտքի մոտ կամ պատուհանի տակ, գունավոր մեծ տառերով գրված ձյան վրա կամ կազմած վառվող մոմերից/ ծաղիկներից: Ուշադրության այդպիսի արտահայտությունները չեն կարող աննկատ մնալ:
Գործի′ դիր վառ երևակայությունդ: Ջերմացրեք իրար ձեր սիրով փետրվարյան այդ գեղեցիկ օրը, և սիրահարվածների տոնը կդառնա այս ամսվա ամենավառ և հիշվող իրադարձությունը:
Անակնկալ նվերների ավելի շատ գաղափարներ կարող ես գտնել նաև այս հոդվածում:
Նկարի համար շնորհակալ ենք այս աղբյուրին, gif անիմացիայի համար` այս:
Հոդվածի կազմող` Սվետլանա Վերտոլա:
Կարդացեք նաև
7 գաղափար ամառային ռոմանտիկ հանդիպումների համար
Ի՞նչ նվիրել տղային …
Ինչպես ուրախացնել մտերիմ մարդուն` հենց այնպես, առանց առիթի
