Այսօր կյանքն արագ փոփոխվում է, և մենք փոփոխվում են դրա հետ միասին: Ժամանակակից մարդու կյանքում առկա են տարատեսակ տեխնիկական միջոցներ` գաջեթներ, որոնք մի կողմից շատ են թեթևացնում մեր առօրյան, սակայն մյուս կողմից կարող են վնաս հասցնել առողջությանը: Տեխնիկական նվաճումները թույլ են տալիս առանց տանից դուրս գալու մի քանի կոճակի սեղմումով պատվիրել մեր ուզած ապրանքը, գտնել ցանկացած տեղեկատվություն, լուծել շատ կենցաղային հարցեր: Նույնիսկ մեքենան կարելի է լիցքավորել առանց խցիկից դուրս գալու 🙂 Սակայն եթե հաշվենք, թե իրականում ինչքան ժամանակ ենք անցկացնում նստակյաց, ուղղակի կսարսափենք:

Պարզենք, թե ինչ է նպաստում կեցվածքի շեղումներին:

• Մենք ավելի քիչ ենք շարժվում, քան մեր նախնիները: Գրեթե ամեն ընտանիք ունի սեփական ավտոմեքենա, մենք մշտապես օգտվում են վերելակներից, ընկերների և բարեկամների հետ ավելի հաճախ շփվում ենք առցանց` առանց սեփական տնից դուրս գալու 🙁 Արդյունքում ժամանակակից մարդուն սպառնում է հիպոդինամիան (ցածր ֆիզիկական ակտիվությունը):
• Նստակյաց վարքագիծը փոխում է կյանքի որակը. ցածր ակտիվության պատճառով մենք ունենում ենք անբավարար տրամադրություն և վատ ինքնազգացողություն: Եվ իհարկե անընդմեջ նստելով և համակարգչի կամ սմարթֆոնի էկրանին նայելով` փչացնում ենք մեր տեսողությունը և կեցվածքը:

Ինչպե՞ս պահպանել ուղիղ կեցվածքը և առողջությունը

Հենաշարժողական համակարգի առողջության համար անհրաժեշտ է`

• լիարժեք սննդակարգ,
• լավ զարգացած մկանների առկայություն,
• ֆիզիկական վարժությունների կանոնավոր կատարում։

Ճիշտ կեցվածքի նշաններն են` բարձր պահած գլուխը, ուղիղ պարանոցը, արտահայտված կրծքավանդակը: Սակայն ժամանակակից երիտասարդները հաճախ ունենում են կլորացած/ կորացած մեջք, երբ գլուխն ու ուսերը թեքված են դեպի առաջ, կրծքավանդակի մկանները կարճացած են, իսկ մեջքի մկանները երկարացած և թույլ: Իհարկե, ժամանակի հետ այդ փոփոխությունները ավելի արտահայտված են դառնում: 🙁

Բնականաբար, կեցվածքի նման խախտումները վտանգավոր չեն կյանքի համար: 🙂 Սակայն նման կազմվածքը հանդիսանում է ոսկրամկանային համակարգի շեղում նորմայից, որը լավ կլինի ժամանակին շտկել: Ինչպե՞ս: Ֆիզիկական վարժությունների միջոցով:

Կեցվածքի լավացման նպատակով գործողությունները ցանկալի է սկսել պարզ մարմնամարզությունից, սկզբում կիրառելով թուլացնող վարժություններ: Ի դեպ, այդպիսի վարժությունները թույլ կտան հանել ինչպես մկանային լարվածությունը, այնպես էլ նյարդահուզական գերլարումը:  🙂

Առհասարակ մարդն ունենում է խնդիրներ ողնաշարի հետ, քանի որ մշտապես քայլում է ուղիղ, ծանրություններ է բարձրացնում ու կրում` մեջքի, և ոչ` ավելի լավ զարգացած ազդրերի և բազկի մկանների հաշվին: Եվ ի վերջո, մեր կյանքում բազմաթիվ են սթրեսները, ինչի արդյունքում մենք ակամայից կլորացնում ենք մեջքը և պարանոցը մտցնում ենք ուսերի մեջ: 🙁 Այդպիսի իրավիճակներում մեզ հարկավոր է թեթև, հանգստացնող և թուլացնող վարժանքներ, որոնք կհանեն ոչ միայն մկանային գերլարվածությունը, այլ նաև կբարելավեն հոգեհուզական վիճակը:

Այդ նպատակին են ծառայում պիլատեսը, սթրեչինգը (ձգման վարժություններ) և յոգան:  Ամեն մի տեսակն յուրահատուկ է և ունի իր առանձնահատկությունները: Կարող ես ընտրել ցանկացած մեկն ինքդ, ըստ քո նախասիրությունների և տրամադրվածության:

Պիլատեսը կձգի և կմարզի մարմինը, կդարձնի այն ավելի գործուն և ճարպիկ:

Սթրեչինգը կազատի մկանների լարվածությունից և կնպաստի հոդերի լրիվ շարժունակության:

Յոգան հոգեկան և ֆիզիկական պրակտիկաների մի ամբողջություն է, որոնք միտված են մարմնի և հոգու ներդաշնակության, և նպաստում է հոգեկան և ֆիզիկական հավասարակշիռ վիճակի: 🙂

Իհարկե, կեցվածքի համար բավականին օգտակար են նաև այլ տիպի մարզանքներ, հատկապես` լողը:

Մարզումներդ պլանավորելիս` հիշիր, որ կարևոր է մարզվել կանոնավոր, և շատ շուտով դու կնկատես դրական տեղաշարժեր` ինքնազգացողության լավացում, ուժերի վերականգնում, մարմնի ձգում և կազմվածքի փոփոխություն, ավելի հանգիստ և լիարժեք քուն և այլ օգուտներ:

Իսկ ժամանակի հետ կարող ես մի քիչ ավելացնել ծանրաբեռնվածությունը և հասնել քո ուզած նպատակին, օրինակ` մարզել որևէ մկանախումբ: Ինչևէ, դինամիկ վարժությունները (ինչպես օրինակ` լողը, պարը, ֆուտբոլը և այլն) ընդհանուր առմամբ ավելի օգտակար են օրգանիզմի համար:

Չունե՞ս հնարավորություն այցելելու ֆիթնես ակումբ: 🙁 Դա դեռ չի նշանակում, որ պետք է շարունակես ապրել նույն պասիվ ռեժիմով և ոչինչ չես կարող անել: Սկսի՛ր ամենապարզից` առավոտյան մարզանքից` սա հրաշալի միջոց է օրն սկսել առույգ և լավ տրամադրությամբ, որն ի դեպ կարող է պահպանվել ամբողջ օրվա ընթացքում: 🙂 Աշխատիր տրամադրել օրական գոնե 10-15 րոպե առավոտյան և երեկոյան մարզանքների համար: Դա լրիվ բավական է ավելի ակտիվ և լավ զգալու համար: Ֆիզիկական վարժանքը կօգնի նաև ազատվել գերհոգնածությունից և վատ մտքերից:

Ինչպե՞ս լավացնել կեցվածքը

Եթե նկատում ես կեցվածքի շեղումներ, հարկավոր է պայքարել դրանց դեմ հնարավորինս վաղ:

Նախ հետևիր, թե ինչպե՞ս ես նստում, ի՞նչ դիրքով: Խուսափի՛ր ոտքն ոտքին դնելուց և վերահսկի՛ր մեջքի դիրքը: Կլորացած մեջքով երկար նստելը նշանակում է, որ գերլարում ես կրծքավանդակի մկանները: Վերին գոտու մկանների ամենօրյա վարժանքը` սթրեչինգը, թույլ կտա  «բացել» կրծքավանդակը, լավացնել շնչառական մկանների աշխատանքը և շնչառությունը:

Մեջքի մկանները շատերի մոտ թույլ են լինում, դրանք հարկավոր է մարզել և ամրացնել բազային պարզ վարժությունների միջոցով: Հաճախ մարդկանց մոտ թույլ են լինում նաև հետույքի մկանները, մինչդեռ ազդրերի հետին մկանները գերլարված են, ինչը նպաստում է գոտկային հատվածի մկանների գերլարման: Այդ խնդրի լուծման համար կիրառվում են հատուկ թուլացնող վարժություններ:

Այսպիսով, հետևի՛ր քո կեցվածքին և եղի՛ր ավելի ակտիվ: Դա կյանքի բարձր որակի գրավականն է, իսկ քո հոդերն ու մկանները շատ շնորհակալ կլինեն քեզնից:

Կազմեց Ե.Մովսեսյանը:

Կարդացեք նաև

Ինչպես լավացնել ուշադրության կենտրոնացումը

Հաճախ լսում ես բողոքներ, թե «ես չեմ կարողանում կենտրոնանալ և երկար պահպանել ուշադրությունը, երբ դասեր եմ անում, հաճախ ցրված եմ, լավ չեմ ընկալում, քանի որ ուղեղս այլ թեմաների շուրջ է մտածում, մեծ դժվարությամբ եմ կարողանում դասերս սովորել և հիշել...» Փորձենք հասկանալ, թե ինչպես կարող ենք լավացնել կենտրոնանալու կարողությունը:

ավելին →

Ինչպե՞ս հասկանալ սեփական մարմինը

Մարդիկ հաճախ մտածում են, որ իրենց մարմինը սովորական մի մեխանիզմ է և անտեսում են նրա պահանջները: Օրինակ` ցավ զգալով, չեն խմում դեղ, «դիմանում են»: Իրականում նման վերաբերմունքը բավականին վտանգավոր է, անկախ թե տանջող ախտանիշները կապված են հիվանդության, թե գերհոգնածության հետ: Բոլոր դեպքերում չարժե անտեսել անհանգստացնող նշանները: Չէ՞ որ, ի վերջո ստիպված կլինես դիմել օգնության: Ուրեմն, ինչպե՞ս հասկանալ սեփական մարմինը: Կարդա՛ այս հոդվածում:

ավելին →

Ինչպե՞ս պահպանել աչքերի առողջությունը

Արտաքին աշխարհից ստացվող ինֆորմացիայի գերակշիռ մասը՝ շուրջ 80%-ը, մենք ստանում ենք տեսողության միջոցով: Տեսողությունը մեր օրգանիզմի կարևորագույն գործառույթներից է. այն ապահովում է աշխարհի ճանաչումը, ճիշտ կողմնորոշումը, առաջադրանքների որակյալ կատարումը, նոր գիտելիքների և հմտությունների ձեռքբերումը: Սակայն ժամանակակից դպրոցականներն ու երիտասադրները հաճախ ունենում են տեսողության խնդիրներ, որոնց մի մասը կարելի է կանխարգելել: Այդ մասին կարդացեք մեր հոդվածում:

ավելին →

Ամառ. ինչպե՞ս այն անցկացնել առանց հիվանդությունների

Վերջապես եկավ ամառը: Դու շատ երկար սպասում էիր ամառային արձակուրդներին, անհամբեր հաշվելով օրերը, և ահա՛, արդեն հունիս ամիսն է: Ինչպե՞ս անցկացնել ամառը, որպեսզի մի լավ հանգստանաս և միևնույն ժամանակ` չհիվանդանաս:

ավելին →