Ողջույն, սիրելի դեռահաս։
Այո, իհարկե, սա նորմալ է։ Կան մարդիկ, որոնք հաճախ են սիրահարվում և հակառակը։
Սերը սովորաբար ունենում է 3 բացադրիչ՝ գրավչություն, մտերմություն և հավատարմություն։ Այս երեք բաղադրիչները կազմում են սիրային հարաբերությունների տարբեր ձևերը: Մտերիմ ընկերների հետ կարելի է կիսել ամենակարևոր բաները, բայց ֆիզիկական գրավչությունն այստեղ կապ չունի: Կարելի է զմայլվել կամ սիրահարվել անծանոթ, համակրելի մարդուն, բայց դա չի նշանակում, որ նրա ներքին աշխարհը համապատասխանում է քեզ, և որ նա քո երկրորդ կեսն է: Իրական սերը ենթադրում է նաև հավատարմություն, ինչը շատ կարևոր է տևական հարաբերություններ կառուցելու համար: Եթե ժամանակի հետ գրավչության բաղադրիչը գնում է հետին պլան, ապա համերաշխ զույգի մտերմությունը և հավատարմությունը ժամանակի հետ ամրանում են և օգնում պահպանել սերը:
Բոլորովին պարտադիր չէ, որ առաջին անգամ սիրահարվելով, դու այսպես հաջորդաբար շարժվես գրավչությունից դեպի մտերմություն, իսկ այնուհետ` հավատարմություն: Դուր գալու, սիրահարվելու և սիրելու միջև կա մեծ տարածություն: Քչերը կարող են միանգամից հասկանալ այդ տարբերությունը։ Իհարկե, երբ ինչ-որ մեկը հանկարծ քեզ համար դառնում է տիեզերքի կենտրոնը, բնականաբար ցանկանում ես հավատալ, որ դա ընդմիշտ է: Այդպես, իհարկե, պատահում է, բայց ոչ հաճախ:
Մեզանից յուրաքանչյուրը հասկանում է սերը յուրովի և արտահայտում է այն իր ձևով։ Տարբեր մարդկանց համար սիրո արտահայտությունները տարբեր են` մեկի համար «սիրո լեզուն» հաճելի խոսքերն են, հատկապես` արտասանելու ձևը և ինտոնացիան: Մյուսը կարևորում է փոքրիկ ուշադրության նշանները և նվերները, մեկ ուրիշը` այն ժամանակը, որը սիրած մարդը պատրաստ է տրամադրել և անցկացնում է նրա հետ: Որոշ մարդկանց անհրաժեշտ են կոնկրետ արարքներ և գործնական օգնություն, իսկ մյուսներին` ֆիզիկական հպումները և գուրգուրանքը:
Ցանկանում ենք քեզ գտնել իրական մեծ սեր։