Ծխախոտի դեմ պայքարի օրվան ընդառաջ ևս մեկ անգամ խոսենք ծխելու վնասների և ծխախոտից հրաժարվելու կարևորության մասին։

Հայտնի փաստ է, որ ծխախոտի ծուխը պարունակում է ավելի քան 4000 տարբեր քիմիական նյութեր, որոնցից 250-ը վնասակար է, իսկ առնվազն 60-ը` քաղցկեղածին: Ի դեպ, շատ վնասակար նյութեր կան նաև էլ․ սիգարետներում և այլ ծխախոտային արտադրատեսակներում։ Քանի որ ծխախոտում պարունակվող նիկոտինը լուրջ կախվածություն առաջացնող նյութ է, ինչքան երկար ես ծխում, այդքան ավելի դժվար կլինի թողնել ծխելը: Ինչևէ, դա բացարձակ չէ․ թողնել հնարավոր է:

Նախ հիշիր, որ անկախ այն փաստից, թե քանի տարի ես ծխում և ինչքան շատ, թողնելը միշտ դրական է քո առողջության համար 🙂

Թողնելով ծխելը` նվազեցնում ես մի շարք վտանգավոր հիվանդությունների ռիսկը, ի դեպ, ոչ միայն` քաղցկեղի, այլ նաև ինֆարկտի, կաթվածի, թոքերի էմֆիզեմայի, ասթմայի և այլ լուրջ խնդիրների: Օրինակ` մեկ տարի չծխելու դեպքում կրկնակի իջնում է սրտի իշեմիկ հիվանդության ռիսկը:

Միաժամանակ, պակասացնում ես շրջակա միջավայրի աղտոտվածությունը, ինչի մասին քչերն են մտածում 🙂 և բնականաբար՝ շրջապատող մարդկանց մոտ շնչառական և մի շարք այլ հիվանդությունների զարգացման հավանականությունը:

Երբե՛ք ուշ չէ թողնել ծխելը և նվազեցնել ծխախոտի թողած վնասները:

Իսկ եթե արդեն որոշել ես, զանգի՛ր ծխախոտի դադարեցման թեժ գիծ 060440001 և կստանաս գործնական խորհուրդներ հոգեբանից։

Ավելին կարդա այս հոդվածում: