Գնումներից հրաժարվելու համաշխարհային օր
Այլ նորություններ
Գնումներից հրաժարվելու համաշխարհային օրը (անգլ. Buy Nothing Day) խորհրդանշում է ավելորդ սպառման դեմ բողոքը։ Ի դեպ, գերսպառումը նկարագրելու համար կիրառվում է հատուկ եզրույթ՝ կոնսյումերիզմ (անգլերենից consume-սպառել)։
Օրը նշվում է նոյեմբերի վերջին շաբաթ օրը, Սուրբծննդյան տոնական վաճառքների սկսվելու ավանդական շրջանում:
«Առանց գնումների օրվա» շրջանակներում ակտիվիստները ցույցեր և տարբեր «հակագովազդային» միջոցառումներ են կազմակերպում առևտրի կենտրոններում, պատմում են ավելորդ ու չմտածված սպառման խնդրի և դրա հետևանքների մասին:
Գնումներից հրաժարվելու օրը միտումնավոր է նշվում «սև ուրբաթ»-ից հետո, երբ զգալի զեղչերի հետևից ընկած՝ մարդիկ «կորցնում են գլուխը» և ձեռքբերում ոչ պետքական ապրանքներ, որոնց զգալի մասը շուտով հայտնվում է աղբանոցներում և աղտոտում շրջակա միջավայրը։ 🙁
Հոգեբանները ապացուցել են, որ այս ակցիան մեծ իմաստ ունի՝ մարդկանց ուշադրությունը գրավելով գերսպառման խնդրի, շրջակա միջավայրին հասցվող ահռելի վնասի և շոպինգից կախվածության վրա։ Չէ՞ որ երջանիկ լինելու համար բոլորովին պարտադիր չէ ձեռք բերել նոր սերնդի սմարթֆոն, բրենդային պայուսակ կամ թանկարժեք մեքենա։ 🙂