Ծխախոտի դեմ պայքարի համաշխարհային օրվան ընդառաջ կրկին խոսենք այս կարևոր խնդրի մասին:

Եվ այսպես.

Ծխախոտի օգտագործումն ունի և′ բժշկական (կարծում ենք, դրանք քեզ քաջ հայտնի են), և′ ոչ բժշկական հետևանքներ, որոնց մասին այդքան էլ շատ չի խոսվում: Այնուամենայնիվ, ծխախոտի օգտագործումը թողնում է նաև այլ բացասական ազդեցություններ, այդ թվում`

• տնտեսական․ ինչպե՛ս ուղղակի` ծխախոտի հետևանքով հիվանդացություն և մահացություն,  այնպե՛ս էլ անուղղակի` բուժման համար ծախսեր, աշխատանքից բացակայություն և նվազ արտադրողականություն․
• սոցիալական․ դեռահասները հաճախ սկսում են ծխել ընկերներից չտարբերվելու նպատակով, այսպես կոչված «սոցիալական ծխողներ»։ Մյուս խնդիրը պասիվ ծխելն է՝ այն անձի համար, ով գտնվում է ծխողի հետ նույն միջավայրում․
• բնապահպանական․ ծխախոտը աղտոտում է շրջակա միջավայրը: 🙁

Ի դեպ, դու կարող ես ինքնուրույն հաշվարկել` ինչքա՞ն գումար կարող է խնայել ընտանիքը ծխելը թողնելու պարագայում:

• Օրական ինչքա՞ն եք ծախսում ծխախոտ գնելով:
• Ամսական ծխախոտային ծախսերի հանրագումարը:
• Տարեկան  ծխախոտային ծախսերի հանրագումարը:
• 10 տարվա ընթացքում ծխախոտային ծախսերի հանրագումարը:
• Ի՞նչ կարող էիր անել այդ գումարով:

Բավականին կլորիկ գումար ստացվեց, այնպես չէ՞:

Առաջարկում ենք նախաձեռնել փոքրիկ հետազոտություն (կամ նախագծային աշխատանք) քո շրջապատում` ծխող ընկերների և բարեկամների շրջանում, թե ինչքան գումար է ծախսվում ծխախոտի վրա, և ինչ են մտածում տարբեր մարդիկ այդ մասին: Հետո կիսվի՛ր արդյունքներով մեր խմբերում։