Նախորդ դարի վերջին գլոբալիզացիան (գլոբալացումը) դարձավ ակտուալ քննարկման թեմա, և այդ քննարկումները ոչ միայն չդադարեցին, այլ նույնիսկ մեծ թափ ստացան:

Գլոբալացումը վերաբերում է տնտեսության, մշակույթի, քաղաքական և կրոնական ոլորտներին, սակայն ամենաակտուալը տնտեսության գլոբալիզացիան է:

Գլոբալացում տերմինը ծագում է globalize բառից, որը վերաբերում է տնտեսական համակարգերի միջազգային ցանցի ի հայտ գալուն:

Առաջին անգամ այս տերմինը օգտագործվել է որպես գոյական 1930 թ.-ի «Towards New Education» վերնագրով մի հրատարակման մեջ, որտեղ այն նշանակում էր կրթության մեջ մարդկության փորձի մի ամբողջական տեսակետ: Դրա հետ առնչություն ունեցող մեկ ուրիշ տերմին՝ կորպորատիվ հսկաներ, 1897 թ.-ին ստեղծվել էր Չարլզ Թեյզ Ռասելի կողմից և վերաբերում էր մեծապես տրանսնացիոնալ հիմնադրամներին և այդ ժամանակի հսկա ձեռնարկություններին:

Մինչև 1960-ական թթ. այդ երկու տերմինները օգտագործվել են որպես հոմանիշներ տնտեսագետների և սոցիոլոգների կողմից: Տնտեսագետ Թեոդոր Լեվիտը «գլոբալացում» տերմինը օգտագործել է իր «Շուկայի գլոբալացումը» հոդվածում:

Սոցիոլոգներ Մարտին Ալբրոուն և Էլիզաբեթ Քինգը գլոբալացումը սահմանում են որպես «այն բոլոր գործընթացների ամբողջություն, որոնց միջոցով աշխարհի մարդիկ միավորվում են մի հասարակության մեջ»:

Այն երկրների միջազգային ինտեգրման գործընթացն է, որը առաջանում է աշխարհայացքների, արտադրանքի, մտքերի և մշակույթի այլ տեսակետների հաղարդակցումից: Գլոբալացմանը նպաստում է տրանսպորտային միջոցների և հեռահաղորդակցության ենթակառուցվածքների զարգացումը:

2000 թ.-ին Արժույթի միջազգային հիմնադրամը ճանաչեց գլոբալացման չորս տեսակ՝ առևտուր և գործարքներ, կապիտալի և ներդրման շարժեր, միգրացիա և մարդկանց տեղաշարժ և կրթության տարածում և սերմանում: Գլոբալացման հետ կապված են նաև գլոբալ տաքացումը, ջրի և օդի աղտոտվածությունը և այլ էկոլոգիական խնդիրներ: 🙁

Այսպիսով, գլոբալացման գործընթացը ազդում է բիզնես կազմակերպությունների, տնտեսության, սոցիալ-մշակութային ռեսուրսների և բնական միջավայրի վրա:

Գլոբալիզացիայի աղբյուրներն են`

▪Գիտատեխնոլոգիական զարգացումը, մասնավորապես համացանցի զարգացում, որի շնորհիվ պետությունների միջև հեռավորությունը աննշան է դառնում: Այսօր մենք ունենք հնարավորություն ստանալ ինֆորմացիա և նույնիսկ առցանց կրթություն` գտնվելով աշխարհի ցանկացած կետում: 🙂

▪ Համաշխարհային առևտուրը, որ դարձել է ավելի ազատ:

▪ Մշակութային ավանդույթների միավորումը:

Գլոբալիզացիան ունի ինչպես շատ դրական, այնպես էլ որոշ բացասական կողմեր: Ինչևէ, այն մեր ժամանակաշրջանի կարևորագույն բնութագրերից է։

Կազմեց Կարինե Տերտերյանը: