էներգետիկ ըմպելիքներ․ նոր վտանգ
Այլ նորություններ
Փորձագետները նախազգուշացնում են, որ դեռահասների կողմից էներգետիկ ըմպելիքների օգտագործումը կարող է լուրջ վնաս հասցնել առողջությանը։
Էներգետիկ ըմպելիքները կոֆեին, ավելացված շաքար, թեթև խթանիչ նյութեր պարունակող ըմպելիքներ են, որոնք հաճախ օգտագործվում են երիտասարդների կողմից թարմանալու, ուժերը վերականգնելու և էներգիա ստանալու նպատակով։
Դրանց ազդեցությունը նմանեցնում են սուրճի ազդեցության։ Ինչևէ, այդ ըմպելիքները ավելի վնասակար են, հատկապես երեխաների և որոշ առողջական խնդիրներ ունեցող անձանց համար։ Ապացուցվել է դրանց անբարենպաստ ազդեցությունը ուղեղի և սրտի աշխատանքի վրա՝ առաջացնելով հաճախասրտություն, գրգռվածություն, ջրազրկում, անքնություն և այլ խանգարումներ։ Նաև էներգետիկ ընպելիքներն առաջացնում են կախվածություն։
Հատկապես վնասակար է էներգետիկ ըմպելիքների զուգակցումը ալկոհոլի հետ։
Ի տարբերություն ալկոհոլի ու ծխախոտի՝ էներգետիկ ըմպելիքների վաճառքը հազվադեպ է սահմանափակվում անչափահասների համար:
Արդյունքում, այդ ըմպելիքները լայնորեն օգտագործվում են դեռահասների կողմից բոլոր երկրներում, այդ թվում նաև Հայաստանում։ Ըստ տվյալների Եվրոպայում մեծահասակների մեկ երրորդը և դեռահասների երկու երրորդից ավելին օգտագործում են էներգետիկ ըմպելիքներ: