Դու հաստատ լսած կլինես օրվա ռեժիմի մասին: Փորձենք բացատրել, թե ինչ դեր է խաղում այն մեր առօրյայում:

Ռեժիմը բառացի` լատիներենից (regimen)  նշանակում է` «կառավարում, ղեկավարում»:

Երբ ասում են օրվա ռեժիմ, նկատի ունեն օրը պլանավորել` բաշխելով և հաջորդելով առօրյա գործողությունները և ըստ պլանավորածի` օրվա որոշակի ժամերին անել տարբեր գործեր: Ռեժիմը ներառում է որոշակի ժամերին սնունդ ընդունելը (լավ է նորնալ մարսողության համար), մոտավորապես նույն ժամին քնելը, մտավոր և ֆիզիկական աշխատանքը հաջորդելը (օրինակ` դաս պատրաստելուց հետո մի քիչ զբոսնել, գնալ պարի կամ սպորտային պարապմունքի), և ամենակարևորը` պահպանել այդ կանոններն ամեն օր:

Իրականում օրվա ռեժիմին հետևելն օգտակար բան է, դա կանոնակարգում և հեշտացնում է առօրվա տարբեր գործերի և հանձնարարությունների կատարումը և թույլ է տալիս ունենալ ազատ ժամանակ: Այն դպրոցականները և երիտասարդները, ովքեր իրենց ազատ ժամանակն ամբողջությամբ անցկացնում են հեռուստացույցի և համակարգչի առջև, ճիշտ չեն վարվում: Ապացուցված է, որ մտավոր աշխատանքից հանգստանալու ամենալավ տարբերակը ֆիզիկական աշխատանքն է, վարժանքը կամ ցանկացած ֆիզիկական ակտիվությունը, օրինակ` մարմնամարզությունը, պարը կամ զբոսանքը մաքուր օդին: ։-)

Այժմ խոսենք քնի մասին:

Առանց քնի հնարավոր չէ ապրել, և մարդն իր կյանքի մոտ մեկ երրորդն անց է կացնում քնելով: Հիշենք, որ մարդուն քնից զրկելը կիրառվում էր որպես տանջանքի դաժանագույն մեթոդներից մեկը: Սակայն մեզանից քչերն են լուրջ ուշադրություն դարձնում քնի ռեժիմին և հաճախ չեն էլ պատկերացնում առողջության և բարեկեցության գործում քնի ունեցած հսկայական դերը:

Լիարժեք քունը հատկապես դպրոցականի և ուսանողի առողջության և աշխատունակության կարևոր նախապայմանն է: Այն օգնում է օրգանիզմի տարբեր հյուսվածքներին և բջիջներին վերականգնվել և հատկապես կարևոր է ուղեղի գործունեության համար: Ոչ բավարար քունը առաջացնում է հոգնածություն, վատ տրամադրություն, ուշադրությունը պահպանելու և կենտրոնանալու դժվարություններ, խանգարում է նորմալ շփումը, իսկ որոշ մարդկանց մոտ կապված է քաշի ավելացման հետ և նույնիսկ նպաստում է առողջական խնդիրների ի հայտ գալուն:

Ուրեմն, կարևորի՛ր քո քունը:

Իսկ եթե ունես քնելու հետ կապված դժվարություններ, հետևիր հետևյալ պարզ խորհուրդներին.

• եղի′ր ակտիվ օրվա ընթացքում, կատարիր ֆիզիկական վարժություններ (իհարկե, ոչ` անմիջապես քնելուց առաջ):
• Զերծ մնա ալկոհոլային խմիչքներից:
• Մաղթի′ր «բարի գիշեր» էլեկտրոնային միջոցներին և տարբեր գաջեթներին: Ննջասենյակում ցանկալի չէ ունենալ հեռուսատացույց և համակարգիչ, հեռախոսը պետք է անջատել և հնարավորության դեպքում` առհասարակ մթեցնել և ձայնամեկուսացնել սենյակը: Բոլոր էլեկտրոնային միջոցները օժտված են նյարդային համակարգն ակտիվացնելու հատկությամբ: Աշխատող համակարգչի կամ հեռախոսի արձակած լույսը խանգարում է օրգանիզմում հատուկ հորմոնի` մելատոնինի արտադրությունը, որը բացի քունը կարգավորելուց շատ կարևոր է նաև լավ առողջական վիճակի համար:
• Պահպանի′ր քնի «ռիտուալ», այն է` առօրյա, սովորույթ դարձած նույն գործողություններ. քնել նույն ժամին, քնելուց առաջ կատարել որոշակի, ըստ անձնական նախասիրությունների, հաճելի և հանգստացնող գործողություններ` գիրք կարդալ, զբոսնել շան հետ, գրառում անել անձնական օրագրում, լսել հանգիստ երաժշտություն, կատարել յոգայի վարժություններ և այլն:
• Քեզ տրամադրի′ր խորը և հանգիստ քնի, մի′ անհանգստացիր և մի′ մտածիր, թե այս գիշեր կրկին լավ չես քնելու:

Եթե խիստ հոգնածություն ես զգում, ապա կարող ես կարճատև քնել նաև ցերեկվա ժամին, դասերից հետո, հատկապես ամառվա շոգ եղանակին: Չէ՞ որ այդպես անում են մի շարք հարավային երկրներում, որտեղ ցերեկվա ժամին, ճաշից հետո, հատկացվում է որոշակի ժամանակ կարճատև քնի կամ հանգստի համար (սիեստա): Ինչևէ, նկատի ունեցիր, որ ցերեկվա քունը չպետք է խանգարի կամ կրճատի գիշերվա քնի տևողությունը:

Մասնագետների կարծիքով մինչև կեսկիշեր քնելն ավելի օգտակար է լիարժեք հանգստանալու, առողջ և առույգ լինելու համար: Ի դեպ, ցանկալի է չխախտել քնելու ռեժիմը նաև շաբաթ-կիրակի և հանգստյան օրերին: Ժողովրդական իմաստությունն ասում է. «որպեսզի մարդը լավ աշխատի, պետք է լավ քնի»:

Այնուամենայնիվ, եթե ունես քնելու հետ կապված խնդիրներ, որոնք  երկար են շարունակվում և չեն անցնում վերը նշված պարզ խորհուրդներից, պարտադիր այցելիր բժշկի:

Նկարները վերցրել ենք այստեղից և այստեղից:

Կազմեց Ե.Մովսեսյանը:

Կարդացեք նաև

Անակնկալ նվերների գաղափարներ Վալենտինի օրվա կապակցությամբ

Սիրահարվածների տոնի նախօրեին շատերը սկսում են մտածել, թե ինչպես անցկացնել այդ տոնը, որ այն դառնա ձեր երկուսիդ համար հիշվող մի իրադարձություն: Ի՞նչ նվիրել: Ի՞նչպես զարմացնել սիրելիին և անակնկալ նվերի օգնությամբ ևս մեկ անգամ ցուցադրել քո սերը և ուշադրությունը: Այդ ամենի մասին կարդա այս հոդվածում:

ավելին →

Ինչպես հասնել հաջողության

Ոչինչ չես հասցնո՞ւմ ու չես հագենո՞ւմ քնից: Քեզ չի հաջողվում օրը ճիշտ կազմակերպե՞լ: Այստեղ դու կգտնես կյանքը ճիշտ պլանավորելու, բացասական երևույթներից խուսափելու և դեպի երազանք տանող ուղին ավելի հաճելի դարձնելու մի քանի խորհուրդ:

ավելին →

Ֆիզիկական ակտիվություն

Շարժումը, ամենօրյա ֆիզիկական ակտիվությունը և առհասարակ ակտիվ կենսակերպը շատ կարևոր է մարդու ֆիզիկական և հոգեկան առողջության համար:

ավելին →

Ինչպես օրվա տևողությունը երկարացնել 4 ժամով կամ վաղ առավոտյան արթնանալու մի քանի պատճառ

«Ոչ մի կերպ չեմ կարողանում հագենալ քնից», «Ժամանակը չի հերիքում անհրաժեշտ գործերն անելու համար», «Ես նորից քնով եմ անցել», «Ես ինձ շատ հոգնած և թույլ եմ զգում». ծանոթ արտահայտություննե՞ր են: Գերծանրաբեռնվածությունը մեր ժամանակների ամենատարածված խնդիրներից է: Եթե ուզում ես իմանալ՝ ինչպես պայքարել դրա դեմ, ապա կարդա այս նյութը:

ավելին →