Հանրային ելույթի և առօրյա շփումների միջև տարբերությունը ոճի մեջ է: Կարդա «Հաղորդակցության վարպետ» նյութը, եթե ուզում ես իմանալ, թե ինչպես դառնալ լավ զրուցակից առօրյա կյանքում:

Եթե նախապատրաստվում ես հանրային ելույթի, ապա անհրաժեշտ է ուշադրություն դարձնել մի քանի հանգամանքի: Նախ, հարկավոր է հաշվի առնել հանդիսատեսի տարիքային առանձնահատկություններն ու նախընտրությունները, ընտրել հատուկ բառապաշար և մտածել՝ ինչպես գրավել և պահել նրանց ուշադրությունը: Հաճախ հենց այս խնդիրներն են անհանգստության պատճառ դառնում և խանգարում հանրության հետ շփումը վայելելուն: Մենք անհանգստանում ենք` հանկարծ մի սխալ բան կասենք կամ կմոռանանք նյութը, և մեր ելույթը կհիշվի որպես ձախողում: Սակայն այս ամենին պետք է լավատեսորեն վերաբերվել և այնպես անել, որ պաշտոնական ոճի բոլոր առանձնահատկությունները դրական ազդեցություն ունենան ելույթի վրա:

Միշտ պատրաստ

1. Մտածիր հագուստի մասին: Նախօրոք ճշտիր կազմակերպիչներից հագուստի մասին, ընտրիր և պատրաստիր այն, որպեսզի տնից դուրս գալուց առաջ ստիպված չլինես հագուստին համապատասխան գուլպա կամ պայուսակ փնտրել:

2. Կազմիր քո սցենարը: Ելույթից առաջ հարկավոր է կազմել տեքստային նյութ և սովորել այն: Եթե կազմես քո սցենարը և հետևես դրան, ապա ամեն ինչ հրաշալի կանցնի: Կարող ես ողջույնի խոսք մտածել, օգտագործել ներածական բառ-մարկերներ, որոշ վիճակագրական տվյալներ և պարզապես շարադրել այն ամենն, ինչ դու շատ անգամներ արել ես տանը ինքդ քո և քո մտերիմների առաջ: Եվ որ ամենակարևորն է, եթե ելույթի ժամանակ շեղվես սցենարից, ապա դա միայն դու կնկատես:

3. Փորձեր արա հայելու առաջ: Գուցե, սա քեզ մի փոքր տարօրինակ թվա, և սկզբում լուրջ դեմքով խոսելու փորձերը ծիծաղ առաջացնեն: Բայց կրկնակի փորձերի արդյունքում կնկատես խոսքիդ առանձնահատկություններն ու թերությունները: Հնարավոր է, որ չարաշահում ես ժեստերի լեզուն, նայում ես բացառապես հատակին կամ միապաղաղ ես խոսում: Դու հնարավորություն ունես նախօրոք շտկումներ կատարելու՝ որոշակի սխալներից խուսափելու համար:

4. Հավաքիր լրացուցիչ նյութեր: Եթե սլայդերի ցուցադրման հնարավորություն կա, ապա ելույթի մեջ անպայման օգտագործիր տեսանյութեր, գրաֆիկներ: Դրանք կծառայեն որպես յուրօրինակ  հուշումներ և ելույթը ավելի տպավորիչ կդարձնեն: Ուշադրություն. ողջ նյութը սլայդերից կարդալը նպատակահարմար չէ: Աշխատիր պատմել նյութը քո սեփական բառերով: Հանդիսատեսը նույնպես կարող է (հավատա′) կարդալ այն, ինչ գրված է էկրանին:

Ելույթի ընթացքում

Փորձը ցույց է տալիս, որ ամենադժվարը սպասելն է ու բեմում գտնվելու առաջին րոպեներն են: Հետո ադրենալինը մի փոքր նվազում է, և սկսում ես ինքնաբերաբար մտաբերել տանը սովորած արտահայտությունները: Այս իրավիճակը կարելի է համեմատել քննության հետ, երբ դու երկար նախապատրաստվում ես, սովորում ու կրկնում ես ինչ-որ նյութեր, սակայն չես դադարում վախենալուց: Բայց երբ դատարկ թուղթը հայտնվում է քո առաջ, դու պարզապես վերցնում ես գրիչն ու սկսում ես վստահ պատասխանել հարցերին (իհարկե, եթե նորմալ սովորել ես նյութը) 🙂

Փորձիր «խաբել ուղեղիդ», պատրաստվիր հաճույքով, ժամանակ առ ժամանակ ընդմիջվելով հանգստանալու համար: Օգտակար է զբոսնել դրսում՝ մտածելով քո «հանճարեղ ելույթի» մասին: Իսկ երբ գա ելույթի ժամանակը, պարզապես կիսվիր ունկնդիրների հետ քեզ այդքան հետաքրքրած տեղեկատվությամբ: Հաճույքով պատմիր, եղիր բաց և մի վախեցիր սխալվելուց: Ի վերջո, եթե անկեղծորեն փորձում ես «գերել» հանդիսատեսին քո ելույթով, ամեն թերություն, ինչպես և քո թեթևակի շփոթվածությունն անտեսվում է:

Նկարի համար շնորհակալություն այս աղբյուրին, անիմացիայի համար` այս:

Հոդվածի կազմող` Սվետլանա Վերտոլա:

Կարդացեք նաև

Ի՞նչ է սպասվում իմ կյանքում դպրոցն ավարտելուց հետո

Ավարտական քննություններն ետևում են (ուռա՜), և շատ շուտով քո կյանքում ամեն ինչ կփոխվի: Համալսարան ընդունվելը մեծ սթրես էր: Բայց սա դեռ սկիզբն է: Չէ՞ որ ընդունվածների ցուցակում քո անունը տեսնելուց հետո պետք է պատրաստվել կյանքի լրիվ նոր մի փուլի, հարմարվել և ընտելանալ նոր միջավայրին: Իսկ թե ինչպե՞ս դա անել, կարդա մեր հոդվածում:

ավելին →

Ինքնատիրապետման գաղտնիքները

Քեզ հետ երբևէ պատահե՞լ է, որ մեկ րոպե առաջ կարծես ամեն ինչ նորմալ էր, իսկ մի ակնթարթ հետո դու արդեն քեզ հազիվ ես պահում, որպեսզի «ափերից դուրս չգաս», չբղավես կամ բաժակդ չշպրտես ինչ-որ մեկի ուղղությամբ, ով քեզ հակառակ բան էր ասել: Իսկ այդ թեժ պահին հնչող «հանգստացի՛ր» կամ «մի՛ ջղայնացիր» բառերը քեզ էլ ավելի են զայրացնում կամ վշտացնում: Կարդա այն մասին, թե ինչու է դա պատահում և թե ինչ անել:

ավելին →