Մոտենում է տարվա ամենասիրված տոնը` Նոր տարին, և բոլորը շտապում են նվերներ պատրաստել մտերիմների և ընկերների համար:

Իսկ դու գիտե՞ս, որ նվերներ տալը ավելի շատ դրական հույզեր է հաղորդում, քան նվեր ստանալը: Դրական հույզերը, որոնք ստանում են մարդիկ` նվերներ տալով մյուսներին, ժամանակի հետ չեն թուլանում։ Հենց այդ պատճառով նվերներ տալը ավելի հաճելի է, քան ստանալը, պարզել են ամերիկացի հետազոտողները, որոնք իրենց գիտական աշխատանքի արդյունքները հրապարակել են Association for Psychological Science պարբերականում։

«Այս կամ այն հաճելի իրադարձությունից կամ գործողությունից ստացած դրական հույզերի ինտենսիվությունը սովորաբար ժամանակի հետ թուլանում է` դա, այսպես կոչված, հեդոնիստական (հաճույքին ձգտելու) հարմարվողականությունն է։ Սակայն երբ խոսքը այլոց ուրախություն պարգևելու մասին է, ապա մենք, կարծես թե, այդ ընդհանուր կանոնից բացառություն ենք նկատում»,- ասում է հետազոտության հեղինակը Չիկագոյի համալսարանից։

Այսպիսով, եթե կանոնավոր նվերներ տաք այլ մարդկանց, ապա ստացած դրական հույզերը չեն թուլանա, փոխանցում է Planet-today-ը։

Աղբյուր` www.news.am: