Քաղցր գազավորված ըմպելիքների վնասակարության մասին քաջատեղյակ են բոլորը: Դրանք պարունակում են շաքարի բարձր քանակներ և որոշ քիմիական միացություններ (այդ թվում օրթոֆոսֆորաթթու), որոնք խանգարում են սննդից մի շարք կարևոր միկրոտարրերի և վիտամինների ներծծումը:

Շաքարի քանակը վերահսկող մարդկանց համար ստեղծվել են քաղցր ըմպելիքների դիետիկ տարբերակներ, որտեղ շաքարի փոխարեն պարունակվում են արհեստական քաղցրացուցիչ նյութեր:

Սակայն ամեն ինչ այնքան էլ պարզ և դրական չէ: Հետազոտությունները ցույց են տվել, որ դիետիկ ըմպելիքները կարող են բարձրացնել ինսուլտների, սրտի նոպայի և դեմենցիայի (թուլամտության) ռիսկը 🙁 Պատճառը հենց արհեստական քաղցրացուցիչներն են, որոնք վնասակար են անոթների համար և բարձրացնում են ախորժակը: Ինչևէ, համաձայն հետազոտողների` դիետիկ քաղցր գազավորված ըմպելիքների վնասակարությունը բարձրանում է այն դեպքերում, երբ դրանք օգտագործվում են մեծ քանակներով` օրական երկու 355մլ-նոց շիշ և ավել:

Ուրեմն, ծարավը հագեցնելու համար ավելի լավ է օգտագործես սովորական մաքուր ջուր, որին կարող ես ավելացնել կիտրոն կամ լայմ, կոճապղպեղ, վայրի վարդի թերթիկներ կամ նանայի տերևներ 🙂